बारामती, ता. ७ : कामगार सप्ताहानिमित्त क्रेडाई बारामतीच्या वतीने बुधवारी (ता. ५) ‘लेबर अवेअरनेस’ कार्यक्रमाचे आयोजन करण्यात आले. यावेळी बांधकाम कामगार कल्याणकारी मंडळाच्या विविध शासकीय योजनांची माहिती देऊन कामगारांना नोंदणीचे आवाहन करण्यात आले.
क्रेडाई सभासद उद्धव गावडे यांच्या साइटवर आयोजित या कार्यक्रमात कल्याणकारी मंडळाचे अधिकारी शंकर बारवकर यांनी मार्गदर्शन केले. यावेळी त्यांनी कामगारांच्या मुलांचे शिक्षण, आरोग्य उपचार, निवास सुविधा आणि आर्थिक साहाय्य मिळवण्यासाठी शासनाकडे नोंदणी करणे आवश्यक असल्याचे सांगितले. तसेच, प्रत्यक्ष नोंदणी प्रक्रिया आणि आवश्यक कागदपत्रांची माहिती दिली.
यावेळी क्रेडाई बारामतीचे अध्यक्ष दत्तात्रेय बोराडे म्हणाले की, ‘‘शासनाच्या योजना तळागाळातील कामगारांपर्यंत पोहोचवण्यासाठी असे उपक्रम अत्यंत उपयुक्त आहेत.’’
या प्रसंगी राहुल खटमोडे, सिद्धार्थ जाचक, आयोजक उद्धव गावडे, उपाध्यक्ष राजेंद्र खराडे, संदीप मेळगर, संदीप धवलशंक यांच्यासह कामगार मोठ्या संख्येने उपस्थित होते.