चाकण, ता. २४: येथील नेहरू चौकात मराठा क्रांती मोर्चाचे समन्वयक यांनी उभे केलेले छत्रपती शिवाजी महाराज यांचे बेकायदा स्मारक चाकण पोलिस व नगरपरिषद प्रशासनाने हटवले. हे स्मारक बेकायदा असून, कोणतीही परवानगी घेतलेली नाही. त्यामुळे प्रशासनाने पुतळ्यासहित स्मारक नगर परिषदेत योग्य ठिकाणी ठेवले आहे. आमचे स्मारक आम्हाला परत द्या या स्मारकाचा अवमान झालेला आहे, अशी मागणी करत मराठा क्रांती मोर्चाचे समन्वयक मनोहर वाडेकर व पुणे, मराठवाड्यातून आलेल्या पदाधिकारी व कार्यकर्त्यांनी पोलिस अधिकारी व नगरपरिषदेच्या अधिकाऱ्यांना धारेवर धरले.
चाकण (ता. खेड) येथे दोन दिवसापूर्वी पहाटेच्या सुमारास मराठा क्रांती मोर्चाचे समन्वयक मनोहर वाडेकर यांनी नेहरू चौकातील मोकळ्या जागेत छत्रपती शिवाजी महाराजांचे स्मारक उभारले होते. हे स्मारक रात्रीच्या सुमारास उभारले असा पोलिसांचा दावा आहे. हे स्मारक बेकायदा कोणतीही परवानगी न घेता उभारले तसेच भाजीपाल्याच्या बाजाराजवळ हे स्मारक उभारले. त्यामुळे योग्य ठिकाणी कायदेशीर परवानगी घेऊन स्मारक उभारण्यात यावे, असे पोलिस अधिकाऱ्यांचे म्हणणे आहे.
दरम्यान, मनोहर वाडेकर व मराठवाड्यातील, पुण्यातून आलेल्या पदाधिकाऱ्यांनी सहाय्यक पोलिस आयुक्त राजेंद्रसिंह गौर व चाकण पोलिस ठाण्याचे वरिष्ठ पोलिस निरीक्षक प्रमोद वाघ यांच्याशी चर्चा केली तसेच नगर परिषदेच्या अधिकाऱ्यांशी चर्चा केली. हे स्मारक आम्हाला परत द्यावे अशी जोरदार मागणी केली.