चाकण, ता. ६ : येथील औद्योगिक वसाहतीतील बिंद्रा इंडस्ट्रीज कंपनीत लिफ्टसाठी खोदलेल्या खड्ड्यात पडून तीन वर्षांपूर्वी अडीच वर्षाच्या मुलीचा मृत्यू झाला होता. याप्रकरणी संबंधित ठेकेदार विशाल सोनावणे (पूर्ण नाव व पत्ता माहीत नाही) याच्यावर नुकताच गुन्हा दाखल केला.
बिंद्रा इंडस्ट्रीज कंपनीत लिफ्टसाठी ठेकेदार आरोपीने कंपनीच्या कामाचे कॉन्ट्रॅक्ट घेऊन काम चालू केले. तिथे लिफ्टसाठी खोदलेल्या खड्ड्याला कंपाउंड अगर आडोसा केला नाही. तेथील सोनू सिरसवाल या सुरक्षारक्षकाच्या अडीच वर्षांच्या तापसी या मुलीचा १७ जुलै २०२२ रोजी दुपारी साडेतीनच्या सुमारास या खड्ड्यात पडून बुडून मृत्यू झाला होता. याप्रकरणी अकस्मात मृत्यू, अशी पोलीस दप्तरी नोंद केली होती. याप्रकरणी तक्रारी अर्ज आल्यानंतर पोलिसांनी चौकशी केली. त्यानंतर पोलिसांनी संबंधित ठेकेदार आरोपी विशाल सोनावणे याच्यावर गुन्हा दाखल केला, अशी माहिती महाळुंगे पोलीस ठाण्याचे वरिष्ठ पोलीस निरीक्षक नितीन गिते, पोलीस उपनिरीक्षक सचिन महाडीक यांनी दिली. याप्रकरणी पोलिसात फिर्याद महाळुंगे पोलिस ठाण्याचे साहाय्यक पोलीस निरीक्षक राकेश उदेसिंग गुमाने यांनी दिली.