चाकण, ता. २२ : येथील पुणे- नाशिक महामार्ग चाकण- तळेगाव, चाकण- शिक्रापूर मार्गावर दररोज सातत्याने होत असलेल्या वाहतूक कोंडीमुळे नागरिकांचे, कामगारांचे अपघात होत आहेत, अनेकांचे जीव जात आहेत तरी प्रशासन, लोकप्रतिनिधी याकडे लक्ष देत नाहीत. सार्वजनिक बांधकाम विभाग नावाला आहे, त्यामुळे नागरिक, कामगार प्रवासी विद्यार्थी हतबल झाले आहेत.
चाकण औद्योगिक वसाहतीला जोडणारे मुख्य रस्ते फारच अरुंद आहेत. अगदी वीस २० ते २५ फुटाचे रस्ते आहेत. त्यावर अतिक्रमणे आहेत. त्यामुळे वाहतूक सातत्याने कोंडी होत आहे. या औद्योगिक वसाहतीला जोडणाऱ्या मुख्य मार्गावर पुणे- नाशिक, चाकण- तळेगाव, चाकण- शिक्रापूर मार्गावर दररोज एक लाखावर वाहने ये- जा करतात. यामध्ये ८० टक्के अवजड वाहने आहेत. या अवजड वाहनांमुळे वाहतूक कोंडी होते आणि ही वाहने कंपन्यांच्या मालाची ने- आण करतात. काही अवजड कंटेनर, ट्रेलर रस्त्यावर बंद पडतात. त्यांना रस्त्यावरून हलविणे वाहतूक विभागाला सुद्धा अवघड होते. त्यामुळे वाहतूक कोंडी होत असते. यामुळे वाहनांच्या रांगा अगदी दोन ते पाच किलोमीटर लागतात. वाहतूक कोंडीकडे लोकप्रतिनिधी लक्ष देत नाहीत, तसेच केंद्रीय सार्वजनिक बांधकाम मंत्री नितीन गडकरी यांनी या मार्गाचे काम होणार असे सांगितले होते, परंतु त्या कामालाही अजून गती मिळालेली नाही.

रस्त्याचे काम लवकर करण्याची मागणी
चाकण- तळेगाव, चाकण- शिक्रापूर मार्गाला राज्य शासनाने मंजुरी दिलेली आहे. सुमारे साडेसहा हजार कोटीच्या खर्चाला मंजुरी दिलेली आहे. परंतु हे काम कधी होणार? यासाठी जमीन संपादन कधी होणार? हे प्रश्न मात्र अनुत्तरीत आहेत. या मार्गाचे काम लवकर करावे, अशी मागणी नागरिक, कामगार, उद्योजकांची आहे.

अधिकारीच बुजवितात खड्डे
औद्योगिक वसाहतीतील रस्त्यावर, तसेच मुख्य रस्त्यावर सातत्याने वाहतूक कोंडी होते. पावसाळ्यात मोठ्या प्रमाणात पाणी साचते. वाहतूक कोंडीमुळे अपघात होतात, त्यामुळे अनेकांचे जीव जातात. याला कोण जबाबदार? असा सवाल नागरिक, कामगारांचा आहे. परंतु प्रशासन यावर काही उपाययोजना करत नाही. वाहतूक कोंडीमुळे प्रवास अगदी दोन ते तीन तासाने वाढतो. ही वाहतूक कोंडी सोडवण्यासाठी कोणी काहीच करत नाही. अगदी रस्त्यावरील खड्डे बुजविण्यासाठी ही प्रशासन उशिरा येते. वाहतूक विभागाचे पोलिस अधिकारी, कर्मचारी खड्डे बुजवतात. त्यामुळे येथे नेमके काय चाललंय? हा प्रश्न प्रवासी आणि नागरिकांना पडला आहे.