चाकण, ता. १३: येथील चाकण तळेगाव,चाकण शिक्रापूर, पुणे नाशिक महामार्गावर होत असलेल्या वाहतूक कोंडीबाबत त्याबाबत मार्गाची सुधारणा , उपाययोजना करण्यासाठी कृती समितीच्या वतीने तसेच नागरिकांच्या वतीने बैठक आयोजित करण्यात आली होती.
चाकण (ता. खेड) येथील औद्योगिक वसाहतीत तसेच मुख्यमार्ग पुणे नाशिक, चाकण तळेगाव, चाकण शिक्रापूर मार्गावर वाहतूक कोंडी होत आहे. या कोंडीला नागरिक, उद्योजक, कामगार, प्रवासी सारेच कंटाळले आहेत. चाकणकर नागरिकांचा, उद्योजकांचा, कामगारांचा संयम संपत चाललेला आहे. कोंडी सोडविण्यात यावी तसेच मार्गांची कामे व्हावी या मागण्यासाठी व इतर उपयोजना काय करणार आहे यासाठी कृती समितीचे कार्यकर्ते, नागरिक, कामगार यांच्यावतीने आज बैठक घेण्यात आली. या बैठकीत अनेकांनी वाहतूक कोंडीबाबत तसेच शासनाकडून रेंगाळलेल्या कामाबाबत विचार व्यक्त केले. या मार्गाची कामे तातडीने व्हावी अशी मागणी केली. यावेळी आमदार बाबाजी काळे, महाराष्ट्र प्रदूषण नियंत्रण मंडळाचे सदस्य नितीन गोरे, खेड कृषी उत्पन्न बाजार समितीचे सभापती विजय शिंदे, प्रिया पवार, रत्नमाला भुजबळ, नागरिक कामगार आदी उपस्थित होते.
दरम्यान, बाबाजी काळे यांनी रस्त्यांची कामे मार्गी लावण्यासाठी शासनाकडे पाठपुरावा करत आहे, असे आश्वासन दिले. चाकण ट्रॅफिक मुक्त झाले पाहिजे अशा उपस्थितांनी यावेळी घोषणा दिल्या. येत्या ता.१६ पासून कृती समितीच्या वतीने तसेच चाकण नागरिकांच्या वतीने पुणे - नाशिक महामार्गावर वाहतूक कोंडी समस्येचा आवाज उठवण्यासाठी, शासनाचे लक्ष वेधण्यासाठी जन आंदोलन करण्यात येणार आहे तसेच उपोषणही करण्यात येणार आहे, अशी माहिती कुणाल कड, प्रशांत टोपे, गणेश नाणेकर, लक्ष्मण जाधव, बाळासाहेब नाणेकर यांनी दिली.