चाकण, ता. २५ : येथील औद्योगिक वसाहतीतील, तसेच मुख्य मार्गावरील वाहतूक कोंडीमुळे नागरिक, कामगार, उद्योजक सर्व त्रस्त झाले आहेत. विविध कंपन्यातील कामगार कामासाठी दोन तास उशिरा पोहोचतात. त्यामुळे कंपनीच्या उत्पादनावर मोठा परिणाम झाला आहे. कंपन्यांचे मोठे आर्थिक नुकसान होत आहे, असे महाराष्ट्र स्वाभिमानी श्रमिक कामगार संघटने अध्यक्ष जीवन येळवंडे यांनी ‘सकाळ’ शी बोलताना सांगितले.
चाकण (ता. खेड) येथील औद्योगिक वसाहतीत अनेक राष्ट्रीय, बहुराष्ट्रीय कंपन्या आहेत. येथील वाहतूक कोंडीमुळे कामगार दोन तास उशिरा येत असल्याने कंपनीच्या उत्पादनावर त्याचा परिणाम होत आहे. उत्पादन साखळी खंडित होत आहे, त्याचा परिणाम कंपन्यांना मोठे आर्थिक नुकसान सोसावे लागत आहे. यामुळे कामगार, उद्योजक अक्षरश: हैराण झाले आहेत.
तसेच, शाळेच्या बसेसला दोन किलोमीटर अंतरासाठी चार तास लागत आहेत. त्यामुळे शाळेतून दुपारी चार वाजता सुटलेली मुले रात्री साडेआठच्या सुमारास घरी पोहोचत आहेत. त्यामुळे पालक वैतागले आहेत. आम्ही जगावे कसे? हा प्रश्न आम्हाला पडत आहे, अशी भावनिक पोस्ट शेअर करत खालुंब्रे (ता. खेड) येथील मयूर पवार यांनी शासनाचे अभिनंदन केले आहे.

वाहतूक कोंडीचा विद्यार्थ्यांना फटका
येथील औद्योगिक वसाहतीतील तसेच, मुख्य मार्गावरील वाहतूक कोंडीमुळे शाळेच्या विद्यार्थ्यांना मोठा फटका बसत आहे. विद्यार्थी शाळेत जाताना उशीर होत आहे. शाळेतून सुटल्यानंतर घरी जाताना एक, दोन तास उशीर होत आहे. अगदी चार तास उशीर होत असल्याने लहान मुले त्रस्त झाली आहेत, असे विद्याव्हॅली शाळेचे अध्यक्ष श्याम देशमुख यांनी सांगितले.

औद्योगिक वसाहतीतले रस्ते ही मोठ्या प्रमाणात वाहतूक कोंडीने जाम झाले आहेत. रस्त्यावर खड्डे पडले आहेत. औद्योगिक वसाहतीतील एका किलोमीटर अंतरासाठी अगदी दोन तास जातात. याकडे एमआयडीसीचे लक्ष नाही. औद्योगिक वसाहतीतून मोठ्या प्रमाणात कर शासनाला जातो. मात्र, शासन येथील रस्त्यासाठी काहीच करत नाही.
- गुरुदास तुपे, उद्योजक