चाकण, ता.२७ : येथील खेड कृषी उत्पन्न बाजार समितीच्या महात्मा फुले बाजार आवारात रविवारी (ता. २७) बीड जिल्ह्यातून सुमारे वीस टन काशीफळ (डांगर) भोपळ्याची आवक झाली. हा भोपळा सुमारे दोन ते दहा किलो वजनाचा आहे. त्यास घाऊक बाजारात प्रतिकिलोला दहा ते बारा रुपये बाजारभाव मिळाला. श्रावण महिन्यात या भोपळ्यास अधिक मागणी असते, असे व्यापारी कुमार गोरे, बाळासाहेब गायकवाड यांनी सांगितले.

बाजारात कांद्याची आवक पाचशे क्विंटल झाली. त्यास प्रतिकिलोला घाऊक बाजारात किमान १० ते कमाल १७ रुपये बाजारभाव मिळाला. पावसामुळे आवक मोठ्या प्रमाणात घटली आहे. इतर जिल्ह्यातून टोमॅटोची सुमारे पन्नास टन आवक झाली. टोमॅटोला घाऊक बाजारात प्रतिकिलोला अगदी पंधरा ते पंचवीस रुपये बाजारभाव मिळाला.
मध्यप्रदेश राज्यातील इंदोर, उत्तर प्रदेशातील आग्रा येथून तसेच गुजरात राज्यातून बटाट्याची अकराशे क्विंटल आवक झाली. त्यास प्रतवारीनुसार तसेच दर्जा नुसार किमान १२ ते १९ रुपये बाजारभाव मिळाला. हिरव्या मिरचीची दिल्लीतून तसेच राज्यातील बुलडाणा व इतर भागातून सुमारे ५० टन आवक झाली.

फळभाज्यांचे भाव पुढील प्रमाणे (प्रतिकिलोचे भाव) : टोमॅटो : १५-२५, कारली : २०-४०, दोडका : ३५-४५, भेंडी : ३०-४०, गवार : ६५-१००, कोबी :१४-१८, फ्लॉवर : १२-१८, वांगी : २०-३०, काकडी : १०-२०, वालवर : ५०-७०, हिरवी मिरची : ६०-७०, दुधी भोपळा : १५-२५, शेवगा :३०-४०, ढोबळी मिरची : ५०-६०, चवळी : ३०- ४०, हिरवा वाटाणा : १२०, गाजर : १५ -२०, आले : २०-३०.

कोथिंबीर, शेपूला मातीमोल बाजारभाव
घाऊक बाजारात मेथी, कोशिंबिरीच्या सुमारे दोन लाख जुड्यांची आवक झाली. मेथीच्या एका जुडीला घाऊक बाजारात मागील आठवड्यात आठ ते दहा रुपये बाजारभाव मिळत होता. यावेळी घाऊक बाजारात मेथीच्या एक जुडीला चक्क दोन रुपये बाजारभाव मिळाला आणि मेथीच्या हजारो जुड्या विक्रीविना मातीमोल झाल्या. कोशिंबिरीच्या एका जुडीला दोन ते तीन रुपये बाजारभाव मिळाला. शेपूच्या जुड्याही विक्री विना तशाच पडून होत्या. पालकच्या सुमारे चार हजार जुड्यांची आवक झाली.

08920