चाकण : नुकताच रक्षाबंधनाचा सण झाला. भावांना बहिणींनी राख्या बांधल्या. परवाचा दिवस आनंदात गेला आणि आज श्रावणी सोमवारनिमित्ताने गावातील महिला जवळच असलेल्या कुंडेश्वरच्या दर्शनासाठी आनंदात निघाल्या होत्या. पण, त्यांना काय माहिती काळ आपल्यावर घाला घालील. महिला आनंदाने पिकअपमध्ये बसल्या होत्या. गप्पागोष्टी रंगल्या होत्या. रस्त्यावरील पहिला चढ आला आणि पिकअप मागे गेला आणि दरीत कोसळला. होत्याचं नव्हतं झालं. अखेरच्या आनंदाचा चेंदामेंदा झाला आणि नात्यांची विन कायमची सुटली गेली. या अपघातात सख्ख्या जावा, नणंद, भावजया मृत पावल्या आणि बोलणारी नाती कायमची संपली.