चाकण, ता. १७ : येथील (ता. खेड) महात्मा फुले बाजार आवारात रविवारी (ता.१७) कर्नाटकहून बेळगावी रताळ्याची वीस टन आवक झाली. श्रावणी सोमवारमुळे त्यास घाऊक बाजारात तीस ते पस्तीस रुपये बाजारभाव मिळाला. हिरव्या मिरचीला प्रतिकिलोला किमान सुमारे ७० रुपये बाजारभाव मिळाला. मात्र, किरकोळ बाजारात मिरची ८० ते शंभर रुपये प्रतिकिलो विकली गेली.

उत्तर प्रदेश, आग्रा, मध्यप्रदेश, इंदोर, गुजरात येथून सुमारे साडेबाराशे क्विंटल बटाट्याची आवक झाली. त्यास प्रतिकिलोला बारा ते वीस रुपये बाजारभाव मिळाला. कांद्याची सुमारे एक हजार क्विंटल आवक झाली. कांद्याला प्रतिकिलोला दहा ते १३ रुपये बाजारभाव मिळाला. नगर, नाशिक जिल्ह्यांतून टोमॅटोची पन्नास टन आवक झाली. घाऊक बाजारात टोमॅटोला प्रतिकिलोस १५ ते ३० रुपये बाजारभाव मिळाला. मात्र, किरकोळ बाजारात त्यास सुमारे ४० रुपये मिळाले.
दरम्यान, बाजारात इंदोर बटाट्याला प्रतिकिलोला किमान १२ ते २० रुपये बाजारभाव मिळाला, अशी माहिती खेड कृषी उत्पन्न बाजार समितीचे सभापती विजय शिंदे, उपसभापती क्रांती सोमवंशी, सचिव बाळासाहेब धंद्रे यांनी दिली.
बाजाराच्या आवारात हिरव्या मिरचीची दिल्लीतून तसेच राज्यातील बुलडाणा व इतर भागातून सुमारे ५० टन आवक झाली. हिरव्या मिरचीला प्रतिकिलोला किमान ५० ते कमाल ७० रुपये भाव मिळाला. किरकोळ बाजारात हिरवी मिरची ८० ते शंभर रुपये प्रतिकिलोने विकली जात आहे.
फळभाज्यांचे भाव पुढीलप्रमाणे (प्रतिकिलोचे भाव) : टोमॅटो : १५-३०, कारली : १५-२५, दोडका : २०-३०, भेंडी : १०-२०, गवार : ३०- ५०, कोबी : ४-६, फ्लॉवर : १०-२०, वांगी : १०-२०, काकडी : १० -२०, वालवर : २०-३०, दुधी भोपळा : १०-२०, शेवगा : २५-४५.

कोथिंबीर, मेथी, शेपूची मोठी आवक
कोथिंबीर, मेथी, शेपू, पालकच्या सुमारे एक लाख वर जुड्यांची आवक झाली. कोथिंबीर, मेथी, शेपू, पालकची मोठ्या प्रमाणात आवक झाल्याने तसेच मागणी कमी राहिल्याने तसेच पावसाची रिमझिमही बाजारात सुरू झाल्याने कोथिंबीर, शेपू, पालक, मेथीच्या एका जुडीला फक्त पाच रुपये भाव मिळाला. त्यामुळे शेतकऱ्यांचे, व्यापाऱ्यांचे मोठे नुकसान झाले.

09075