चास, ता. १० ः कडधे (ता. खेड) येथे सुरू असलेल्या खेड तालुका किर्तन महोत्सवाचा भाग म्हणून श्री क्षेत्र खंडोबा मंदिरात शुक्रवारी (ता. ९) डिसेंट फाउंडेशन व श्री बालाजी फाउंडेशन पुणे यांनी मोफत आरोग्य शिबिराचे आयोजन केले होते. या शिबिराचा ७४९ गरजूंनी लाभ घेतला.
या शिबिरात नेत्र तपासणी, बालरोग, स्त्री रोग, ब्रेस्ट कॅन्सर पूर्व तपासणी, हाडांचे आजार, मधुमेह, रक्तदाब व रक्तातील विविध तपासण्या करण्यात आल्या. याशिवाय सत्तर वर्षांपुढील ज्येष्ठ नागरिकांचे वय वंदना नावनोंदणी व ओळखपत्र काढण्यात आले. शिबिरात शंकरा आय हॉस्पिटल, डी. वाय. पाटील आयुर्वेद हॉस्पिटल पिंपरी, भीमाशंकर मेडिकल कॉलेज मंचर, अॅपेक्स हॉस्पिटल, सुश्रुत हॉस्पिटल, स्व. सुखलालजी खाबिया हॉस्पिटल, पंचायत समिती आरोग्य विभाग खेड, हिंद महालॅब यांनी सहभाग घेऊन विविध तपासण्या केल्या. शिबिरासाठी हुतात्मा राजगुरू सोशल फाउंडेशनच्या वतीने औषधे उपलब्ध करून देण्यात आली होती.
शिबिरामध्ये डिसेंट फाउंडेशनचे संस्थापक जितेंद्र बिडवई, संचालक आदिनाथ चव्हाण, तालुका आरोग्य अधिकारी डॉ. विलास माने, रंगनाथ महाराज नाईकडे, बिपिन महाराज कोरडे, नवनाथ थोरात, हुतात्मा राजगुरू सोशल फाउंडेशनचे अध्यक्ष बाळासाहेब सांडभोर, उपाध्यक्ष नाजनीन शेख, डॉ. नीलम गायकवाड, अॅड. अनिल जाधव, अॅड. मनिषा पवळे, राजन जांभळे आदी उपस्थित होते.