चास, ता. १२ : खेड तालुक्याच्या पश्चिम पट्यातील सह्याद्रीच्या डोंगररांगांमध्ये विस्तृत प्रमाणात असणाऱ्या करवंदांच्या जाळ्या बहरू लागल्या आहेत. लवकरच या परिसरातील प्रामुख्याने आदिवासी नागरिकांना डोंगरच्या काळ्या मैनेच्या रूपात व्यवसायाच्या वाटा सुरू होणार आहेत.
खेडच्या पश्चिम पट्ट्यात आदिवासी नागरिकांचे वस्तीस्थान आहे. या परिसरात असणाऱ्या डोंगरराशी येथील आदिवासी नागरिकांसाठी खरीप व रब्बी पिकांचा हंगाम संपताच उन्हाळ्यामध्ये काळी मैना उत्पन्नाचा मुख्य स्रोत असतो. या परिसरात मोठ्या प्रमाणावर करवंदांच्या जाळ्या असून या जाळ्या सध्या पांढऱ्याशुभ्र फुलांनी बहरू लागल्या आहेत. ही पांढरीशुभ्र फुले मंद सुगंधांनी पर्यटकांना आकर्षित करीत असली तरी या फुलांपासून तयार होणारी फळे मात्र कित्येक आदिवासी नागरिकांचे संसार फुलवणारी आहेत. याचा सगळ्यात जास्त फायदा येथील स्थानिक नागरिकांना रोजगाराच्या रूपाने होणार आहे. उन्हाळ्यात सर्वत्र शेतीची कामे ठप्प झाल्यावर, कोणत्याही प्रकारचे उत्पन्नाचे साधन नसताना या सह्याद्रीच्या कुशीतून फुलणारा हा रानमेवा आदिवासींच्या चरितार्थाचा मुख्य आधार ठरतो.

04306