दौंड, ता. १८ : दौंड-कुरकुंभ महामार्गावरून १६ गोवंशाची बेकायदा वाहतूक केल्याप्रकरणी दोन वाहन चालकांविरुद्ध गुन्हा दाखल केला आहे. काष्टी (ता. श्रीगोंदा, जि. नगर) येथील आठवडे बाजारातून गोवंशाची शनिवारी (ता. १७) दौंडमार्गे कर्नाटक येथे वाहतूक करणार असल्याची माहिती गोरक्षकांना मिळाली होती. त्यानुसार गोरक्षण क्षेत्रात सामाजिक काम करणाऱ्या तरुणांनी मोरे वस्ती येथे दोन वाहने अडवून पाहणी केली. त्यामध्ये ४ गावरान बैल, ४ जर्शी गाया, ६ गावरान गाया व दोन वासरे, अशी एकूण १६ गोवंश जनावरे कोंबण्यात आली होती. यानंतर संबंधित वाहने दौंड पोलिस ठाण्यात आणण्यात आल्यानंतर पोलिसांनी पशू वैद्यकीय अधिकारी यांना तपासणीसाठी पाचारण केले. याप्रकरणी अहिरेश्वर जगताप यांच्या फिर्यादीनुसार पोलिसांनी रेवणसिध्द मल्लापा उटगी (रा. हवीनाळ, इंडी, कर्नाटक) व प्रकाश नागप्पा वालीकर (रा. कडचण, इंडी, कर्नाटक) या दोन चालकांविरुद्ध गुन्हा दाखल केला आहे. दरम्यान, पोलिसांनी सहा तास या गोवंशांना चारा आणि पाण्यापासून वंचित ठेवले.