दौंड, ता. ११ : दौंड पोलिस ठाण्यासमोरील एका हॅाटेलमध्ये झालेल्या चोरीत चाळीस हजार रुपयांची रोकड चोरीस गेली आहे. विनाक्रमांकाच्या दोन दुचाकी वाहनांचा या चोरीसाठी वापर करण्यात आला.
दौंड पोलिस ठाण्यासमोरील हॅाटेल कल्पलता येथे सोमवारी (ता. ११) पहाटे ३ वाजण्याच्या दरम्यान ही चोरी झाली. चोरट्यांनी हॅाटेलच्या भोवती असणाऱ्या गल्ल्या आणि समोरील रस्त्यांवर पाळत ठेवत ही चोरी केली. विना क्रमांकाच्या दुचाकीवरून आलेल्या दोन चोरट्यांनी हॅाटेलचे शटर उचकटले. त्यापैकी एकाने आत प्रवेश करीत गल्ल्यातील चाळीस हजार रुपयांची रोकड चोरली. दौंड पोलिसांना याबाबत माहिती देण्यात आली आहे. हॅाटेलच्या दुसऱ्या मजल्यावर कामगार वास्तव्य करतात, मात्र काही मिनिटांमध्ये झालेल्या चोरीचा त्यांना पहाटे सुरू असलेल्या पावसामुळे सुगावा देखील लागला नाही. ५५ वर्षात पहिल्यांदाच हॅाटेलमध्ये चोरी झाल्याची माहिती मालक निरंजन शेट्टी यांनी दिली.