डोर्लेवाडी, ता.१७ : डोर्लेवाडी (ता. बारामती) येथील दिंडीचे आषाढी वारी पालखी सोहळ्यासाठी देहूकडे प्रस्थान झाले. या दिंडीला ग्रामस्थांच्या वतीने निरोप देण्यात आला.

वैकुंठवासी गणपत आबाजी काळे महाराज दिंडी, सांप्रदायिक भजनी मंडळ डोर्लेवाडी यांच्या वतीने गेल्या ४१ वर्षांपासून आषाढी वारीत संत तुकाराम महाराज पालखी सोहळ्यात सहभाग घेत आहे. वारीत दरवर्षी २०० ते २५० वारकरी देहू ते पंढरपूर पायी वारी करीत आहेत. आज या वारीसाठी वारकऱ्यांचे देहूकडे प्रस्थान झाले. सकाळी संत सावता महाराज मंदिर संत तुकाराम मंदिर येथे दर्शन घेऊन दिंडीची ग्राम प्रदक्षिणा झाली. त्यानंतर दिंडीच्या वाहनाचे विणेकरी, तुळस याचे पूजन करण्यात आले. यावेळी सरपंच सुप्रिया नाळे, उपसरपंच राणी नेवसे, सहेली फाउंडेशनच्या अध्यक्षा रोहिणी आटोळे, दिंडीचे प्रमुख बाळासाहेब महाराज नाळे, दत्तात्रेय महाराज घुले, श्रीधर महाराज शिंदे आदी मान्यवरांसह भाविक मोठ्या संख्येने उपस्थित होते. पूजन केल्यानंतर दिंडीने देहूकडे प्रस्थान ठेवले.

लोकवर्गणीतून पंढरपुरात भक्तनिवास
डोर्लेवाडी येथील दिंडी ना नफा ना तोटा या तत्त्वावर वारकऱ्यांना पायीवारी घडविते. दिंडीच्या वतीने लोकवर्गणीतून पंढरपूर येथे भक्तनिवास बांधकाम झाले आहे. त्यामध्ये परिसरातील भाविकांची व वारकऱ्यांची मोफत राहण्याची सोय केली जाते.

01090