देऊळगाव राजे, ता. १९ : काळेवाडी (ता. दौंड) येथील दिवंगत सुभद्रा गायकवाड यांच्या सतराव्या पुण्यस्मरणानिमित्त सुभद्रा डेंटल क्लिनिक आणि बुधराणी हॉस्पिटल पुणे यांच्या वतीने आरोग्य शिबिराचे आयोजन केले. यावेळी मोफत नेत्र तपासणी आरोग्य शिबिरात सुमारे १०० रुग्णांची तपासणी करण्यात आली. यातील १६ रुग्णांवर मोतीबिंदू शस्त्रक्रिया करण्यात येणार असून सर्व रुग्णांना बुधराणी हॉस्पिटल पुणे या ठिकाणी पाठवण्यात आले.
दौंड येथील दंत चिकित्सक डॉ. संदीप गायकवाड आणि कुटुंबीयांच्या वतीने शिबिराचे दरवर्षी आयोजन करण्यात येते. त्यामुळे पंचक्रोशीतील गरीब, गरजू रुग्णांना याचा लाभ घेता येतो. रुग्णसेवा व सामाजिक बांधीलकी या संकल्पनेतून हा कार्यक्रम राबविण्यात येतो त्यामुळे गायकवाड परिवाराचे परिसरामध्ये कौतुक होत आहे. दरवर्षी बुधराणी हॉस्पिटल यांच्या वतीने असे शिबिर घेण्यात येत असल्याचे गणेश गायकवाड यांनी सांगितले. या कार्यक्रमासाठी माजी सरपंच किसनराव गायकवाड, हरिश्चंद्र गायकवाड, बापूराव पहाणे, संदीप गायकवाड, बापूराव दिवेकर, अभिमन्यू माने, कैलास काळे, सुरज कडाकणे, आरोग्य सेविका अनिता भोसले आदी उपस्थित होते.