घोडेगाव, ता. ३१ : आंबेगाव तालुक्यातील पेसा क्षेत्रातील पिंपळगाव घोडे ग्रामपंचायतीमध्ये झालेल्या गैरव्यवहार प्रकरणी कारवाई व्हावी, या मागणीसाठी ग्रामस्थ व ग्रामपंचायत सदस्य प्रवीण ढमढेरे यांनी घोडेगाव (ता. आंबेगाव) येथील पंचायत समिती कार्यालयासमोर बेमुदत उपोषण २६ मेपासून सुरू केले आहे. या उपोषणाला पहिल्या दिवशी तीन ग्रामपंचायत सदस्यांनी उपस्थित राहून पाठिंबा दिला आहे.
पिंपळगाव घोडे येथील प्रवीण ढमढेरे, दिलीप काळे, अश्विनी पोखरकर, निशा बोऱ्हाडे या ग्रामपंचायत सदस्यांनी ग्रामपंचायतीमध्ये झालेल्या गैरकारभाराविरुद्ध आवाज उठवून उपोषणाचा मार्ग स्वीकारला आहे. १६ मे रोजी विस्तार अधिकारी सागर कांबळे यांनी आम्ही दिलेले तक्रारी अर्ज व जाबजबाब व ग्रामपंचायत पदाधिकाऱ्यांनी दिलेले जबाब यावर आधारित चौकशी अहवाल बनवण्यात आला नाही. अहवालात प्रचंड तफावत असून, नवीन चौकशी अधिकारी नेमावेत, यामध्ये काही ग्रामस्थ, आजी- माजी पदाधिकारी, माध्यम प्रतिनिधी यांचा समावेश असावा. संबंधित चौकशी घटनास्थळी जाऊन इन कॅमेरा व्हावी, अशी मागणी उपोषणकर्त्यांनी केली आहे. याबाबत उपोषणकर्ते प्रवीण ढमढेरे म्हणाले, ‘‘उपोषणाचा आज पाचवा दिवस आहे. मात्र, अधिकाऱ्यांनी अजूनही याप्रकरणी ठोस कारवाई केली नाही. त्यामुळे उपोषण सुरूच राहणार आहे.’’
विस्तार अधिकारी आर. सी. हुजरे म्हणाले, ‘‘सदर ग्रामपंचायतीमध्ये प्राथमिक चौकशी शुक्रवारी करण्यात आली आहे. याबाबतचा अंतिम अहवाल सोमवारी गटविकास अधिकारी यांना सादर करण्यात येईल. त्यानंतर पुढील कारवाई होईल.’’