गुळुंचे, ता. २८ : नीरा (ता. पुरंदर) येथे अखिल शिवजयंती उत्सव समिती निरा-शिवतक्रार यांच्यावतीने छत्रपती शिवाजी महाराजांची जयंती साजरी करण्यात आली. भव्य पारंपरिक मिरवणुकीने या तीन दिवसीय शिवजयंती कार्यक्रमाची सांगता झाली.

या तीन दिवसीय शिवजयंती कार्यक्रमात वकृत्व स्पर्धा, पोवाडे स्पर्धा व छत्रपती शिवाजी महाराज यांच्या गाण्यावरती नृत्य स्पर्धा यांचा समावेश होता. दुसरे दिवशी प्रभाग क्रमांक ४ मध्ये पतीच्या निधनानंतर मुलांना कर्तृत्ववान बनविणाऱ्या आदर्श मतांच्या हस्ते शिवप्रतिमेचे पूजन करून त्यांचा सन्मान केला. तसेच येथील घुले मैदानावर शिवज्योत पूजन व शिवपूजन करण्यात आले. या शिवजनमोत्सवाची सांगता पारंपारिक पद्धतीने मिरवणूक काढून केली.

यावेळी आकर्षक ढोल पथक, गाठी मलखांब, हलगी, वादक, तसेच मावळे व घोड्यावरती लहान मुलांनी छत्रपती शिवाजी महाराज यांची वेशभूषा साकारली होती. ठिकठिकाणी भगवे झेंडे लावले होते. नीरा व पंचक्रोशीतील असंख्य शिवप्रेमी सोहळा पाहण्यासाठी आले होते. या सोहळ्याचे नियोजन अखिल शिवजयंती उत्सव समिती नीरा शिवतक्रार यांच्यावतीने केले होते.