गुळुंचे, ता. ८ : नीरा (ता. पुरंदर) येथील रयत संकुलातील लीलावती रिखवलाल शहा कन्या विद्यालयातील १० वीच्या गाइड पथकाच्या मुलींनी संत ज्ञानेश्वर महाराज पालखी सोहळ्यामध्ये सेवा कार्य दिले. पुणे जिल्हा भारत स्काऊट आणि गाइड जिल्हा संस्थेने पालखी सोहळ्यामध्ये स्काऊटच्या विद्यार्थ्यांना पाणी, फळे वाटप, स्वच्छता मोहीम राबविण्याचे आवाहन केले होते. त्या आवाहनाला प्रतिसाद देत विद्यालयातील गाइडनी सेवाभावी कार्यात सहभाग नोंदविला.
यावेळी मुलींनी दिंडीतील वारकऱ्यांना जेवण वाढणे, पाणी देणे, पाय चेपून दिले, त्यांची विचारपूस करून त्या कीर्तनात आनंदाने सहभागी झाल्या.
यावेळी सेवा कार्य करण्यासाठी विद्यालयातील गाइड प्रमुख अश्‍विनी खोपे यांनी विद्यार्थिनींना प्रोत्साहन दिले. शाळेच्या मुख्याध्यापिका निर्मला नायकोडी तसेच इतर सर्व सहकारी शिक्षकांनी मुलींचे कौतुक केले.