सासवड शहर, ता. २८ : सासवड (ता. पुरंदर) येथे सासवड, जेजुरी, परिंचे व पिसर्वे या मंडल क्षेत्रात शंभर टक्के अनुदानावर साडेचारशे क्विंटल भुईमूग बियाणांचे वाटप करण्यात आले. शासकीय इमारतीत शेतकऱ्यांना शुक्रवारी हा उपक्रम राबविण्यात आला.
पुरंदर तालुक्यात यावर्षी जून महिन्यातच सर्व धरणे जवळपास पूर्ण क्षमतेने भरण्याच्या मार्गावर असताना तसेच सर्व भागात दमदार पावसाने हजेरी लावल्यामुळे यावर्षी शासनाने लागवड क्षेत्रात वाढ व्हावी म्हणून प्रमाणित बियाण्याचे १०० टक्के अनुदानावर वाटप सुरू केले आहे. याचा शेतकऱ्यांना लाभ व्हावा म्हणून तालुक्यात साडेचारशे क्विंटल भुईमूग व ३७.५० क्विंटल सोयाबीन बियाण्याचे वाटप करण्यात आले असल्याची माहिती तालुका कृषी अधिकारी श्रीधर चव्हाण यांनी दिली.
यावेळी मंडल कृषी अधिकारी अमोल सुतार, उपकृषी अधिकारी गणेश जगताप, उपकृषी अधिकारी रवींद्र खेसे, शेतकरी भाऊसाहेब कामठे, किसनमहाराज चव्हाण आदी उपस्थित होते.