सासवड शहर, ता. २५ : संत शिरोमणी सावता महाराज पालखी सोहळ्याने सासवड (ता. पुरंदर) येथील संत सोपानकाका मंदिर येथून अरण (ता. माढा) कडे उत्साहात प्रस्थान ठेवले. सकाळी ७.३० वाजता पाडेगाव (फलटण) येथून श्रींच्या पादुकांना नीरा स्नान घालण्यात आले.
पादुका सासवड येथे आल्यानंतर सोपानकाकांच्या मंदिरात संतांच्या भेटीसाठी आणण्यात आल्या. वीणा मंडपात गणेश महाराज राऊत यांच्या सोहळा प्रस्थानाची कीर्तनसेवा झाली. यावेळी सोहळा संस्थापक अध्यक्ष दिलीप महाराज झगडे यांनी दिंडीकरी, वारकरी, महिला-पुरुष, सोहळ्यात सहभागी वैष्णव जनांचे स्वागत केले. माजी आमदार संजय जगताप यांनी भाविकांचे स्वागत केले.
संत सोपानकाका देवस्थान सासवड यांच्या वतीने गोपाळ महाराज गोसावी यांनी आशीर्वाद दिले. सासवड देवस्थान चोपदार सिद्धेश महाराज शिंदे यांनी सावता महाराज यांच्या पादुका संत सोपानकाकांच्या समाधीस भेटीसाठी गाभाऱ्यात नेल्या. त्यानंतर देवस्थानच्या वतीने पादुकांची विधीवत पूजा करण्यात आली. यावेळी सासवडकरांच्या वतीने महाप्रसाद देण्यात आला. सोहळा कार्याध्यक्ष दत्तात्रेय फरांदे महाराज, उपाध्यक्ष भानुदास हिंगणे, सचिव महावीर भुजबळ, राजाभाऊ अडसूळ, अनिल विधाते, बाळासाहेब बारवकर, संदीप हिंगणे या सर्वांचा सासवड देवस्थान आणि ग्रामस्थ यांच्या वतीने सुधाकर गिरमे, अरविंद म्हेत्रे, वामन भोंगळे, चंद्रकांत गिरमे, बाळासाहेब राऊत, राजेंद्र लांडगे, सुनील वढणे यांनी श्रीफळ देऊन सत्कार केला. पालखी सोहळ्याच्या वतीने दिलीप महाराज झगडे यांनी सासवड देवस्थानचे गोपाळमहाराज गोसावी आणि चोपदार सिद्धेश शिंदे यांना सन्मानित केले. ज्ञानोबा-तुकाराम सावता महाराजांचा जयघोष करीत श्रींच्या पादुका पालखीत ठेऊन वीणा मंडपातून पालखी मंदिर प्रदक्षिणा घालण्यात आली. त्यानंतर पालखी सोहळा अरणला मार्गस्थ झाला. पालखी सोहळा रथासाठी हिरामण जगताप (बेलसर- सासवड) यांच्या बैलजोडीस मान आहे. पालखी सोहळ्यात पायीवारीसाठी ४०० पुरुष -महिला वारकरी सहभागी झाले आहेत.