गराडे, ता. १९ : कोडीत येथे मार्गशीर्ष महिन्यातील दर्शवेळा आमवस्येनिमित्त पहाटे श्रीनाथ म्हस्कोबा आणि देवी जोगेश्‍वरी देवांना महारुद्र अभिषेक घालण्यात आला. आरती झाल्यानंतर दर्शनासाठी मंदिर खुले करण्यात आले. त्यानंतर मंदिरात राजीवडे मंडळी कोडीत ग्रामस्थ मंडळाच्या वतीने विविध फुलांची सजावट करण्यात आली होती. दिवसभर अमावस्या असल्यामुळे भाविकांनी कोडीत येथील मंदिरात रांगा लावून दर्शनाचा लाभ घेतला.
सकाळी धूप आरतीची झाल्यानंतर मंदिर प्रदक्षिणा झाली. त्यानंतर नैवेद्य घेऊन पुन्हा मंदिर प्रदक्षिणा झाली. यावेळी गुलालाची उधळण करत ‘नाथ साहेबांचे चांगभलं’चा जयघोष करण्यात आला. त्यानंतर मंदिरात छबिन्याचा कार्यक्रम होऊन मंदिरात राजीवडे मंडळी कोडीत ग्रामस्थ मंडळाच्या वतीने महाप्रसादाचा कार्यक्रम झाला.