गुनाट. ता. १२ : करडे (ता. शिरूर) येथील चव्हाणवाडी रस्त्यालगत असणाऱ्या इसवे-घायतडक वस्तीवर गुरुवारी माजी सरपंच रुक्मिणी घायतडक यांच्या घराजवळून रात्री नऊ वाजता बिबट्याने कुत्र्याचे पिल्लू उचलून नेले. घराच्या सुरक्षिततेसाठी लावण्यात आलेल्या सीसीटीव्ही कॅमेऱ्यामध्ये हा प्रकार कैद झाला आहे.
दरम्यान, घराच्या परिसरातच बिबट्याने शिकार केल्याने वस्तीवरील रहिवाशांमध्ये भीतीचे वातावरण आहे. यासंदर्भात वनविभागाला कळविले असता सध्या पिंजरा उपलब्ध नाही, लवकरच तो उपलब्ध करून लावण्यात येईल, असे आश्‍वासन अधिकाऱ्यांनी दिले आहे. आसपास लपण्यासाठी जागा नसल्याने हा प्रवास करणारा फिरस्ता बिबट्या असावा असा अंदाज अधिकाऱ्यांनी वर्तविला, परंतु अशीच घटना एक महिन्यापूर्वी याच घराजवळ घडली होती. तेव्हाही एक कुत्रा गायब झाला होता. त्यामुळे या परिसरात बिबट्याचे वास्तव्य असल्याचा अंदाज आहे.‌

बिबट्या शिकारीसाठी थेट मानवी वस्तीला लक्ष्य करू शकतो, हे अनेकदा सिद्ध झाले आहे. त्यामुळे वनविभागाने तातडीने पिंजरा लावून बिबट्याला जेरबंद करणे गरजेचे आहे. वनविभागाने नागरिकांच्या सुरक्षेला प्रथम प्राधान्य दिले पाहिजे.
- अमोल घायतडक, ग्रामस्थ, करडे