इंदापूर, ता. २५ ः महसूल विभागाच्या सर्व डिजिटल व ऑनलाइन सेवा जास्तीत जास्त नागरिकांनी वापराव्यात. त्यामुळे कार्यालयीन गर्दी टाळता येईल आणि काम अधिक पारदर्शक व प्रभावी होईल, असे आवाहन अतिरिक्त जिल्हाधिकारी सुहास मापारी यांनी केले.
इंदापूर तालुक्यातील महसूल विभागाच्या कामकाजाचा आढावा गुरुवारी (ता. २४) पुणे जिल्ह्याचे अतिरिक्त जिल्हाधिकारी मापारी आणि उपजिल्हाधिकारी नामदेव टिळेकर यांनी घेतला. यावेळी त्यांनी ई- हक्क, ई- फेरफार, ई- चावडी, ई- रेकॉर्ड, ई-क्यूज कोर्ट आणि ई- ऑफिस यासारख्या डिजिटल प्रणालीबाबत अधिकाऱ्यांकडून सविस्तर आढावा घेतला.
या बैठकीस तहसीलदार जीवन बनसोडे यांच्यासह नायब तहसीलदार, मंडळ अधिकारी, ग्राम महसूल अधिकारी, कार्यालयीन कर्मचारी, तसेच महसूल सेवक आणि महा ई- सेवा केंद्र चालक उपस्थित होते. यावेळी देण्यात आलेल्या माहिती नुसार इंदापूर तालुक्यात ई- हक्क पोर्टलवर पाच हजार ५१० नोंदी केल्या गेल्या असून, तालुक्यातील नागरिकांकडून ऑनलाइन प्रणालीचा मोठ्या प्रमाणात उपयोग होतो आहे. त्यामुळे प्रत्यक्ष कार्यालयात येण्याची गरज कमी होत असून, वेळेची बचत, कागदपत्रांची अचूकता, आणि कामात पारदर्शकता मिळत असल्याबाबत ही माहिती देण्यात आली.

इ.- सेवा वापरल्यास नागरिकांसाठी फायदे
घरबसल्या सेवा
वेळ, पैसा व श्रमांची बचत
अचूक नोंदी व दस्तऐवज
भ्रष्टाचाराला आळा
सेवा मिळण्यात सुसूत्रता