जेजुरी, ता. १९ : जेजुरी नगरपरिषदेच्या निवडणुकीची मतमोजणी रविवारी (ता. २१) सकाळी दहा वाजता सुरु होणार आहे. दहा टेबलावर आणि दोन फेऱ्यात मतमोजणी होणार असून, तासाभरात संपूर्ण निकाल येईल, अशी माहिती जेजुरी नगरपालिका निवडणूक निर्णय अधिकारी शीतल मुळे यांनी दिली.
नगराध्यक्षपदासाठी तीन, तर नगरसेवकपदासाठी पन्नास उमेदवार रिंगणात आहेत. दहा टेबलावर दोन फेऱ्यांत मतमोजणी होणार आहे. त्यामुळे निकाल लवकर लागेल, असा अंदाज आहे. पालिकेच्या एकूण २० जागांसाठी राष्ट्रवादी कॉंग्रेस आणि भाजप यांच्यात अनेक ठिकाणी सरळ लढत झाली. काही ठिकाणी शिवसेना व अपक्ष उमेदवार रिंगणात आहेत. नगराध्यक्षपदासाठी शिवसेनेचा उमेदवारही रिंगणात आहे. त्यामुळे नगराध्यक्षपदासाठी तिरंगी लढत आहे. मतमोजणी करण्यासाठी रविवारी शहरात पोलिस बंदोबस्त ठेवण्यात आला आहे.