जुन्नर, ता. ३० : तालुक्याच्या पश्चिम आदिवासी भागातदेखील बिबट्याच्या वावरामुळे नागरिकांची चिंता वाढू लागली आहे. घोगरेवाडी- आपटाळे (ता. जुन्नर) परिसरात गेल्या काही दिवसांपासून तीन बिबटे सायंकाळनंतर मुक्तपणे फिरताना दिसून आल्याने त्यांना पकडण्यासाठी पिंजरा लावण्याची मागणी होत आहे.
घोगरेवाडी- आपटाळे येथील ग्रामस्थ विकास सोसायटीचे माजी अध्यक्ष महेंद्र पवार, जिल्हा दूध संघाचे उपाध्यक्ष भाऊसाहेब देवाडे, राजेश घोगरे, रोहिदास उत्तर्डे, बाळासाहेब उत्तर्डे यांनी या भागातील बिबट्याचा बंदोबस्त करावा, अशी मागणी वनविभागाकडे केली. येथील प्राथमिक आरोग्य केंद्र, तसेच पशुवैद्यकीय दवाखाना परिसरात तीन बिबटे रात्रीच्या वेळी फिरताना अनेकांनी पाहिले आहे. त्यांचे व्हिडिओ देखील काढून समाज माध्यमात व्हायरल केले आहेत. या भागातील पथदिवे बंद असल्याने रात्रीच्या वेळी बाहेर पडणे भीतीचे झाले आहे. वीज मंडळाने पथदिवे सुरू करावेत, अशीही नागरिकांची मागणी आहे.