जुन्नर,ता.१५ : गावपातळीवरील कृषी सहाय्यकांनी गेल्या आठवड्यापासून पुकारलेल्या असहकार आंदोलनाची वरिष्ठ पातळीवरून दखल घेण्यात आली नाही. उलट हे आंदोलन दडपण्याचे प्रयत्न सुरू असल्याचा आरोप कृषी सहाय्यकांकडून केला जात आहे. यामुळे गुरुवारपासून (ता.१५) कृषी सहाय्यकांनी बेमुदत काम बंद आंदोलन सुरू केले असल्याची माहिती जुन्नर तालुका कृषी सहाय्यक संघटनेच्या अध्यक्ष राजश्री नरवडे यांनी दिली.
जुन्नर तालुक्यातील बेल्हे, नारायणगाव, जुन्नर व ओतूर या चारही मंडल विभागातील ४८ कृषी सहाय्यक बेमुदत काम बंद आंदोलनात सहभागी झाले आहेत. आंदोलनाचा कृषी विभागातर्फे राबविण्यात येणाऱ्या विविध योजना तसेच धोरणांच्या अंमलबजावणीवर परिणाम होण्याची भीती व्यक्त होत आहे. कृषी सहाय्यकांच्या असहकार आंदोलनामुळे ऐन खरिपाच्या तोंडावर शेतकऱ्यांना पुरविण्यात येणाऱ्या बियाणे, खते, औषधांच्या वाटपावर विपरीत परिणाम झाला आहे.
याचबरोबर शिवार फेरी, बांधावरील मार्गदर्शन ठप्प झाले आहे. आंदोलन लांबले तर खरिपाच्या पेरण्या अडचणीत येण्याची शक्यता आहे. दरम्यान, पाच मेपासून ऑनलाइन योजनांच्या अंमलबजावणीवर बहिष्कार टाकला आहे. बहिष्कारामुळे शेतकऱ्यांना पुरविण्यात येणाऱ्या बियाणे, खते, औषधांच्या वितरणावर परिणाम झाला आहे. तसेच शेतकऱ्यांसाठी आयोजित केले जाणाऱ्या शिवार फेऱ्या, शेतकरी मार्गदर्शन सत्रे रखडली आहेत. कृषी विभागाकडून ऐन खरिपात कामबंद आंदोलन करू नये अशी मनधरणी केली जात आहे.

समान काम, समान वेतन धोरणानुसार कृषी सेवकांना कृषी सहाय्यक म्हणून नियमित करावे. पदनामात बदल करावा, योजनांसाठी पायाभूत सुविधा पुरवाव्यात. पदोन्नतीसाठी आकृतीबंधात कृषी पर्यवेक्षकांच्या जागांमध्ये वाढ करावी, आदी मागण्यांसाठी आंदोलन केले जात असल्याचे नरवडे यांनी सांगितले.