जुन्नर,ता.२५ : सलग पडत असलेल्या अवकाळी पावसामुळे आदिवासी भागातील शेतकऱ्यांचे जनजीवन विस्कळित झाले आहे. बदलत्या हवामानामुळे शेतकरी हवालदिल झाला आहे. गेले पंधरा दिवस पडणाऱ्या पावसाने भात शेतीची कामे व अगोटाची कोणतीही तयारी करता आली नसल्याचे आदिवासी समाज प्रबोधिनीचे विश्वस्त तानाजी तळपे यांनी सांगितले.
यंदा आदिवासी भागात शेतकरी धूळ वाफेवरची पेरणी साधारणतः: रोहिणी ते मृग नक्षत्र निघण्याच्या अगोदर करतात. उद्यापासून सोमवारपासून (ता.२६) रोहिणी तर ८ जूनपासून मृग नक्षत्र सुरू होत आहे. जुन्नर तालुक्यात सुमारे ४० टक्के उन्हाळी बाजरी काढणे बाकी आहे. तसेच काढलेली बाजरीची कणसे पंधरा दिवसांपासूनझाकून ठेवली आहेत. त्यांना आवश्यक ऊन मिळत नसल्याने मोड यायला सुरुवात झाली आहे. याचबरोबर उन्हाळी भुईमूग देखील काढणे बाकी आहे. पावसामुळे शेंगाना जमिनीतच मोड यायला सुरुवात झाली आहे असल्याचे शिवेचेवाडी येथील आदिवासी शेतकरी बाळू मोधे यांनी सांगितले.

यापूर्वी गेल्या अनेक वर्षात अशी स्थिती पहावयास मिळाली नाही. ना मृग किडे, ना काजव्यांचे चांदणे नजरेस पडले. पहिल्या पावसाच्या मातीचा सुगंध देखील अनुभवता आला नाही.हा उन्हाळा आहे की पावसाळा असा प्रश्न शेतकऱ्यांना पडला आहे.
- धोंडू लांडे, आदिवासी शेतकरी, केवडी

08559