जुन्नर, ता. ७ : जुन्नर तालुका सहकारी खरेदी-विक्री संघाच्या वतीने शेतकऱ्यांना खरीप हंगामासाठी आवश्यक असणारे विविध प्रकारचे बियाणे उपलब्ध करून देण्यात आले आहे. शेतकऱ्यांनी याचा लाभ घ्यावा, असे आवाहन संघाचे अध्यक्ष शिवदास विधाटे व उपाध्यक्ष किसन महाकाळ यांनी केले आहे.

महाराष्ट्र राज्य बियाणे महामंडळाकडील दर्जेदार इंद्रायणी, फुले समृद्धी, भोगावती हे भात बियाणे तसेच फुले किमया केडीएस ७५३ व फुले संगम केडीएस ७२६ सोयाबीन बियाणे संघाच्या जुन्नर, नारायणगाव व ओतूर डेपो येथे उपलब्ध झाले आहे. खरेदी विक्री संघात पुरेसा बियाणे साठा उपलब्ध असून सर्व प्रकारची रासायनिक व मिश्र खते देखील विक्रीस उपलब्ध आहे. खरेदी-विक्री संघाचे मार्गदर्शक ॲॅड. संजय काळे यांच्या सूचनेनुसार जुन्नर येथे नव्यानेच नामांकित कंपन्यांची शेतीउपयोगी औषधे खरेदी विक्रीचा व्यवसाय सुरू केला आहे. शेतकऱ्यांनी युरियासह, सर्व प्रकारची रासायनिक खते, बी-बियाणे संघातून खरेदी करण्याचे आवाहन केले आहे.
कृषी विभागाच्या राष्ट्रीय खाद्य तेल अभियानाअंतर्गत निवड झालेल्या शेतकऱ्यांना वाटपासाठी शंभर टक्के अनुदानावर बियाणे संघाकडे उपलब्ध झालेले आहे. कृषी विभागाच्या मार्गदर्शनाखाली संस्थेच्या जुन्नर डेपोकडून वितरण व्यवस्था केली आहे. जिल्हा अधीक्षक कृषी अधिकारी यांनी महाबीजमार्फत पुरवठा करण्यात येणाऱ्या बियाणे मात्रेचे जुन्नरसाठी ४७.६५ क्विंटल लक्षांश दिले आहे. ज्या शेतकऱ्यांनी सोयाबीन बियाण्यासाठी डीबीटी ऑनलाइन पोर्टलवर अर्ज केले आहेत. त्यांची लॉटरी पद्धतीने निवड केली सर्वांना सोयाबीन केडीएस ७५३ (फुले किमया) बियाणे मोफत दिले जाणार आहे.

08609