जुन्नर,ता.१९ : जुन्नर तालुक्याच्या आदिवासी भागामध्ये गेल्या तीन दिवसांपासून मुसळधार पाऊस होत आहे. आंबोली, उच्छिल परिसरात पावसामुळे भात खाचरे पाण्याने भरली आहेत. ओढे, नदी, नाले दुथडी भरून वाहत आहेत. परिसरातील डोंगरावरून वाहत येणाऱ्या पाण्यामुळे धबधबे खळखळून वाहत आहेत.
संततधार पावसामुळे शेतीची कामे ठप्प झाली आहेत. मुसळधार पावसामुळे उतरून आलेल्या भात रोपांचे नुकसान होण्याची भीती व्यक्त केली जात आहे.पावसामुळे पाळीव जनावरे देखील गोठ्यातच बांधून ठेवावी लागत आहेत. काही ठिकाणी वाहत्या पाण्याच्या प्रवाहामुळे जाण्या-येण्याचा संपर्क तुटला आहे. शालेय विद्यार्थ्यांना देखील शाळेत येणे जाणे जोरदार पावसामुळे अडचणीचे होत आहे. पावसाबरोबर जोराचा वारा व धुके याला सामोरे जावे लागत आहे.
अनेक ठिकाणी भात रोपे उगवून वर आली असल्याने सध्या मोठा मुसळधार पाऊस होणे गरजेचे नाही. हा पाऊस असाच राहिला तर पश्चिम भागातील भात शेती संकटात येण्याची भीतीने शेतकरी चिंतेत आहेत.