जुन्नर, ता.३० : गुन्ह्यातील जप्त केलेल्या गोवंशाचा अंतिम ताबा मिळण्यासाठी खरेदीदारांनी जुन्नर न्यायालयात केलेला अर्ज न्यायालयाच्या प्रथमवर्ग न्यायदंडाधिकारी स्वप्ना घुले यांनी फेटाळला आहे. याबाबतचा खटला प्रलंबित असल्याने गोवंशाचा अंतरिम ताबा पुणे पांजरपोळ ट्रस्ट भोसरी यांच्याकडे कायम ठेवला आहे, अशी माहिती ॲड.वैभव परदेशी यांनी दिली.
याबाबतची माहिती अशी की बेल्हे (ता.जुन्नर) येथील जनावरांच्या बाजारातून दिनकर मुंडे, मधुकर मुंडे व मेघराज नागरगोजे यांनी आठ बैलांची खरेदी केली होती. सदरचे गोवंश कत्तलीसाठी वाहतूक करत असताना आढळून आल्याने आळेफाटा पोलिस ठाण्यात गुन्हा दाखल करण्यात आला. गुन्ह्यातील जप्त बैलांचे मालक असल्याचे सांगत खटला प्रलंबित कालावधीत सदर गोवंशाचा अंतरिम ताबा मिळावा, यासाठी खरेदीदारांनी न्यायालयात अर्ज केला होता.
अर्जावरील दिलेल्या निकालपत्रात पुणे पांजरपोळ ट्रस्टला गोवंशासाठी दररोज प्रतिगोवंश दोनशे रुपये देखभाल खर्च मिळण्याचा अधिकार असल्याचे नमूद केले आहे. गुन्ह्यातील तपास अधिकाऱ्यांनी प्राण्यांचे क्रूरतेपासून संरक्षण करणाऱ्या कायद्याच्या गुन्ह्यात जप्त प्राण्यांची काळजी व भरण पोषण बाबतचे नियम २०१७ मधील कलम ३(ए) ची पूर्तता करावी तसेच देखभाल खर्चाची रक्कम भरण्यासाठी अर्जदार मालकांनी सात दिवसाचे आत हमीपत्र द्यावे असे निर्देश दिले आहेत. पांजळपोळ संस्थेच्या वतीने शिवशंकर स्वामी यांच्या मार्गदर्शनाखाली गोरक्षक शिवराज सांगनाळे उपस्थित होते. न्यायालयीन कामकाज ॲड. वैभव परदेशी यांनी पाहिले.