जुन्नर, ता. २६ : भक्तीभावाला निसर्गसंवर्धनाची जोड देत मरहट्टे सह्याद्रीचे दुर्ग संवर्धन संस्थेच्या वतीने याही वर्षी पर्यावरणपूरक घरगुती गणपती सजावट व सामाजिक संदेश स्पर्धा आयोजित केली आहे.
अत्यंत श्रद्धा आणि भक्तिभावाने साजऱ्या होणाऱ्या सणानिमित्त भक्त आपल्या कलागुणांना सजावटीतून व्यक्त करतात. समाजात निसर्ग संवर्धनाचा चांगला संदेश जाण्याच्या हेतूने ही स्पर्धा आयोजित केली जात असल्याचे आयोजक अमोल ढोबळे यांनी सांगितले. स्पर्धेतील प्रथम तीन क्रमांकास रोख बक्षीसे, तसेच सन्मानचिन्ह व प्रमाणपत्र देण्यात येणार आहे. तसेच, सहभागी स्पर्धकांमधून दहा भाग्यवान विजेत्या स्पर्धकांना छत्रपती श्री शिवरायांच्या जीवनावरील प्रत्येकी एक पुस्तक देवून सन्मानित करण्यात येणार आहे.
स्पर्धेतील सहभागासाठी आवश्यक माहिती, फोटो, व्हिडिओ स्पर्धेचे नियम आणि अटी https://forms.gle/PhSpCiUhqBjoaJjz6 या लिंकमध्ये दिल्या असून, त्यानुसार स्पर्धेत सहभागी व्हावे, असे आवाहन करण्यात आले आहे.