खळद, ता. ३० : आठ दिवसांपासून सुरू असलेल्या अवकाळी पावसामुळे खळद परिसरात शेत शिवारामध्ये पाणी साचले आहे. गावातील काही घरांची पडझड होऊन नुकसान झाले आहे. या पडझडीची नुकसान भरपाई मिळावी अशी मागणी शेतकरी वर्गाकडून होत आहे.
यावर्षी प्रथमच मे महिन्यामध्ये नदीला पाणी आले आहे. यामुळे येथील शेतकरी सुखावला आहे. सध्या गावाला पिण्याच्या पाण्याची टंचाई असून शासकीय टँकरने येथे पाणीपुरवठा होतो. मे महिन्यातच नदीला पाणी आल्यामुळे हा प्रश्‍न मार्गी लागेल असे दिसत आहे.
नदीच्या पाण्याने शेतकरी सुखावला असला तरी वारंवार येणाऱ्या पुरामुळे नदीलगत असणाऱ्या घरांना नदीच्या पुराचे पाणी लागून घरांची दुरवस्था झाली आहे. नदीलगत राहणारे ग्रामपुरोहित बाळासाहेब गुरव यांच्या घराची भिंत या पावसात पडली असून त्याचे नुकसान झाले आहे. नदीला महापूर आल्यास त्यांच्या घरात पाणी जाऊन घर वाहून जाण्याची भीती त्यांच्या मनात निर्माण झाली आहे.
याबाबत शासनाच्या आदेशाची वाट न पाहता ग्रामपंचायत पदाधिकाऱ्यांच्या विनंतीनुसार तलाठी सतीश उमाप, ग्रामसेवक महेंद्र लोणकर, कृषी सहाय्यक स्वाती यादव, सरपंच संदीप यादव, सदस्य योगेश कामथे, शिवाजी कामथे, कैलास खळदकर यांनी येथे भेट देऊन याची पाहणी केली. नुकसानग्रस्त भागाचा त्याचप्रमाणे गावातील इतर पडझड झालेल्या घरांचाही पंचनामा करून नुकसान भरपाई मिळावी यासाठी हे प्रस्ताव शासनाकडे पाठवण्याचा निर्णय घेतल्यामुळे संबंधितांनी समाधान व्यक्त केले आहे.

गावोगावी पावसाचे प्रमाण वेगवेगळे आहे. मात्र पावसाची नोंद होताना मंडल विभागनिहाय होते. ज्या गावात पर्जन्यमापक यंत्र आहे येथील पावसाच्या नोंदीनुसार संपूर्ण मंडल क्षेत्राच्या नुकसान भरपाईचा विचार केला जातो. ज्या गावात पर्जन्यमापक नाही तेथे अतिवृष्टी झाली आहे, त्यांना या नोंदीचा फटका बसत आहे. तरी शासनाने नुकसान भरपाई निकषांत बदल करून गावोगावी प्रत्यक्ष नुकसानीची पाहणी करून भरपाई द्यावी.
योगेश कामथे, ग्रामपंचायत सदस्य, खळद