कडूस, ता. २९ : तिन्हेवाडी (ता.खेड) येथे जमिनीच्या वादातून शेतातील उभ्या ज्वारी पिकावर व जनावरांच्या चाऱ्यासाठी वापरल्या जाणाऱ्या नेपियर गवतावर तणनाशक औषध फवारण्यात आले. यामुळे शेतकरी चंद्रकांत पठारे यांचे मोठे नुकसान झाले.
नुकसानग्रस्त शेतकऱ्याने राजगुरुनगर पोलिस ठाण्यात फिर्याद दिली आहे. तिन्हेवाडीच्या सांडभोरवाडीतील शेतकरी पठारे यांच्या शेतात हा प्रकार घडला आहे. पठारे यांनी अर्धा एकर पेक्षा जास्त क्षेत्रावर ज्वारीचे पीक व जनावरांच्या खाद्यासाठी नेपियर जातीच्या गवताचे पीक घेतले होते. परंतु या दोन्ही पिकांवर खोडसाळपणे तणनाशक औषधाची फवारणी केल्याने संपूर्ण पीक करचळून नुकसान झाले आहे. याबाबत त्यांचा मुलगा नीलेश पठारे याने पोलिसांत फिर्याद दिली. शेतकरी पठारे यांनी महसूल विभागाकडे लेखी तक्रार केली आहे. तलाठी रजनी बानाईत व कृषी सहायक किरण कानडे यांनी घटनास्थळी येऊन पंचनामा केला.