कडूस, ता. ९ : कडूस येथील महात्मा गांधी विद्यालय व कनिष्ठ महाविद्यालयाचा विद्यार्थी आर्यन वरकड याने विभाग स्तरावरील शालेय वेटलिफ्टिंग स्पर्धेत चमकदार कामगिरी करीत राज्यस्तरीय शालेय वेटलिफ्टिंग स्पर्धेच्या निवड यादीत स्थान मिळविले आहे.
महाराष्ट्र राज्य शालेय शिक्षण व क्रीडा विभाग तसेच जिल्हा क्रीडा अधिकारी कार्यालय, हुतात्मा राजगुरु महाविद्यालय राजगुरूनगर व खेड तालुका क्रीडा शिक्षक संघटना यांनी संयुक्तपणे राजगुरूनगर येथे शनिवारी (ता. ६) विभागस्तरीय शालेय वेटलिफ्टिंग स्पर्धेचे आयोजन केले होते. या स्पर्धेत खेड तालुका एज्युकेशन सोसायटी संचालित महात्मा गांधी विद्यालय व कनिष्ठ महाविद्यालयाच्या आर्यन वरकड याने ९८ किलो वजन गटात १९० किलो वजन उचलून प्रथम क्रमांक मिळवला. तर, तन्मय जाधव याने ६५ किलो वजन गटात ११७ किलो वजन उचलून तृतीय क्रमांक मिळवला. यातील वरकड याची नाशिक (मनमाड) येथे होणाऱ्या राज्यस्तरीय शालेय वेटलिफ्टिंग स्पर्धेत निवड झाली आहे. आर्यनला विद्यालयाच्या प्राचार्या संध्या कांबळे, उपमुख्याध्यापिका अस्मिता पाठक, पर्यवेक्षक सोपान निसरड, तालुका क्रीडा संघटना अध्यक्ष नितीन वरकड, अशोक सांडभोर, वर्षा गुट्टे, दीपक चव्हाण, दिलीपकुमार गुप्ता यांनी मार्गदर्शन केले. खेड तालुका एज्युकेशन सोसायटीचे अध्यक्ष हरिभाऊ सांडभोर, उपाध्यक्ष अजित लुणावत, मानद सचिव गणेश जोशी तसेच रेखा जाधव, हौशीराम मुठे, लतीफ शाह, सुनिता ठाकूर, संदेश जाधव यांनी यशस्वी खेळाडूंचे अभिनंदन केले.