पळसदेव, ता. ७ ः पळसदेव (ता. इंदापूर) येथे एअरटेल नेटवर्कची सेवा वारंवार खंडित होत असल्याने नागरिकांमधून तीव्र संताप व्यक्त होत आहे. खंडित सेवेमुळे ऐनवेळेस कामे खोळंबली जात आहेत. हा प्रकार वारंवार घडत आहे. मात्र, परिस्थिती सुधारण्यासाठी कंपनीकडून काहीही प्रयत्न होत नसल्याचे ग्रामस्थ सांगतात.
एकीकडे मोबाईल कंपन्यांकडून मासिक रिचार्जचे दर वाढविण्यात आले आहेत. दुसरीकडे त्या तुलनेत सेवा देण्याकडे मात्र, साफ दुर्लक्ष झाल्याचे दिसून येत आहे. यामध्ये वापरकर्ता ग्राहक भरडला जात आहे. ग्राहकांची होणारी लुट व नुकसान याबाबत तक्रार कोणाकडे व कशी करावी याबाबत ग्रामीण भागातील नागरिक अनभिज्ञ असल्याने, गेल्या काही दिवसांपासून खंडित सेवेचे मासिक रिचार्ज करून ग्राहक आर्थिक भुर्दंड सोसत आहेत.
गावातील ग्राहकांना नेटवर्क पुरविण्यासाठी एअरटेल कंपनीचा मनोरा आहे. यातून लगतच्या काही गावे व वाड्यावस्त्यांवरील नागरिकांना मोबाईलचे नेटवर्क मिळते. मात्र, गेल्या काही महिन्यांपासून नेटवर्क मिळत नसल्याची तक्रार ग्रामस्थ करत आहेत.
पळसदेवचे पोलिस पाटील अनिल कुचेकर सांगितले की, ‘‘वास्तविक सध्या ग्राहकांना टॉकटाईमबरोबर इंटरनेट डाटा महत्त्वाचा आहे. मोबाईलमधील विविध अॅपसाठी इंटरनेट डाटा गरजेचा आहे. मात्र, ५जी नेटवर्कची सेवा गावात उपलब्ध नाही. उपलब्ध नेटवर्क वारंवार खंडित होते. यामुळे मोबाईलवरून होणारी सर्व कामे ठप्प होतात. त्यामुळे नेटवर्कमध्ये सुधारणा होण्याची गरज आहे.’’
ग्राहक पंचायतीचे राज्य संघटक सर्जेराव जाधव यांनी सांगितले की, ‘‘गेल्या काही वर्षांत फुकटात सिम वाटप केलेल्या मोबाईल नेटवर्क कंपन्यांकडून हळूहळू रिचार्ज प्लॅनच्या दरात वाढ करण्यात आली आहे. यातही सेवा सुरळीत व प्लॅनप्रमाणे मिळत नसेल, तर ग्राहकांना वैयक्तिक अथवा सामूहिकपणे भारतीय दूरसंचार नियामक प्राधिकरणाकडे सेवेतील त्रुटीबद्दल ऑनलाइन तक्रार करता येते.’’