कानगाव, ता. ७ : शहरी भागाप्रमाणेच ग्रामीण भागातही समाज माध्यमाद्वारे लग्नपत्रिका पाठविण्याकडे कल वाढला आहे. घरोघरी जाऊन पत्रिका वाटण्याच्या सोपस्काराला फाटा देत आता समाज माध्यमाचा अधिक वापर होत आहे. त्यामुळे छपाईचे प्रमाण ६० ते ७० टक्क्यांनी घटले आहे. त्याचा प्रिंटिंग, ऑफसेट व्यावसायिकांना फटका बसतो आहे.
लग्नकार्य ठरताच मुहूर्ताच्या महिनाभर आधी लग्नपत्रिका छापून त्यांचे नातेवाईक, मित्रमंडळींना वाटप केले जात होते. गेल्या काही वर्षांत घरोघरी जाऊन छापील लग्नपत्रिका वाटपाचा कल कमी झाला आहे. कमी वेळेत सहजगत्या अनेकांना आमंत्रण देणे शक्य होत असल्याने समाज माध्यमावर लग्नपत्रिका पाठवण्याचे प्रमाण वाढले आहे. पूर्वी पत्रिका मिळाली की नाही, याला महत्त्व दिले जायचे. मात्र, आता बदलत्या काळानुसार लोकही सोशल मीडियावर डिजिटल लग्नपत्रिका स्वीकारायला लागले आहेत. शिवाय प्रत्यक्ष भेटीऐवजी सोशल मीडियावर पत्रिका पाठवून द्या, असे लोकच म्हणू लागले आहेत. त्यामुळे लग्नपत्रिका छपाई करण्याऐवजी डिजिटलला प्राधान्य दिले जात आहे.
डिजिटल लग्नपत्रिका बनविण्यासाठी मोबाईलवर वेगवेगळे ॲप्सही उपलब्ध आहेत. त्यातील तयार डिझाईनवर फोटो, नावे टाकले की लग्नपत्रिका तयार होते. त्यावरूनच नातेवाईक, मित्रमैत्रिणींना शेअर केले जाते. याचा डिझायनर्सच्या कामांनाही फटका बसला आहे. त्यासाठी वेगवेगळ्या सोशल मीडिया प्लॅटफॉर्मचा वापर केला जात आहे. त्यामुळे घरोघरी जाऊन आमंत्रण देण्याची प्रथा कालबाह्य होत आहे.
केवळ देव देवता आणि ग्रामदेवतेला ठेवण्यासाठी पुरतील इतक्याच कमीत कमी ५० ते १०० पत्रिका छपाई करून घेतल्या जात आहेत. त्यामुळे प्रिंटिंग, ऑफसेट यांचे काम कमी झाल्याने त्यांचे नुकसान होत आहे.