कानगाव, ता. २० : पाटस (ता. दौंड) गावामध्ये जाणाऱ्या मुख्य रस्त्याला सुरुवातीपासूनच अनेक मोठमोठे खड्डे पडले आहेत. याच मार्गावरून संत तुकाराम महाराज पालखी ग्रामदैवत श्री नागेश्वर मंदिर या ठिकाणी विसाव्यासाठी येत असते. संत तुकाराम महाराज पालखी सोहळा २५ जून रोजी पाटस (ता. दौंड) येथे दाखल होणार आहे.
येथील छत्रपती शिवाजी महाराज चौक ते नागेश्वर मंदिरापर्यंतच्या रस्तावर मोठमोठे धोकादायक खड्डे पडलेले आहेत. गावामध्ये जाणारा हा मुख्य रस्ता असल्यामुळे या रस्त्यावरून शाळेत जाणारी मुले, महिला, वयोवृद्ध नागरिक यासारखे हजारो लोक दिवसभरात ये- जा करत असतात. मे महिन्यात झालेल्या पावसामुळे गावात पाणी शिरले होते. ग्रामपंचायत प्रशासनाला हे पाणी काढण्यासाठी तीन दिवस गेले. या तीन दिवसानंतर रस्त्यावर खड्डेच खड्डे निर्माण झाले आहेत. पावसाची उघडीप झाल्यानंतर रस्त्याची कामे करणे गरजेचे होते. परंतु ग्रामपंचायतीने याकडे काणाडोळा केला आहे. असंख्य खड्यांमुळे नागरिकांना खड्डा चुकवून प्रवास करताना मोठी कसरत करावी लागत आहे. यामुळे अपघात घडत असून, हा रस्ता वाहतुकीसाठी धोकादायक बनला आहे.

खड्ड्यांमुळे मणके मोडण्याची वेळ
याच पालखी मार्गावर असणाऱ्या ओढ्यावरील पूलही एका बाजूने खचला आहे. ओढ्याजवळ, तसेच पाटस गावच्या वेशीजवळ पडलेला खड्डा
मोठा असून, धोकादायक आहे. खड्ड्यांमुळे नागरिकांचे मणके मोडण्याची वेळ आली आहे. तरी प्रशासनाने लवकरात लवकर या रस्त्याचे काम पूर्ण करावे, अशी नागरिकांमधून मागणी होत आहे.