कानगाव, ता. २८ : पाटस- कानगाव (ता. दौंड) रस्त्याची ठिकठिकाणी खड्डे पडल्याने दुरवस्था झाली आहे. यातून मार्ग काढताना वाहनचालक व प्रवाशांना मोठी कसरत करावी लागत आहे. संबंधित विभागाने याची दखल घेत रस्त्याची तत्काळ दुरुस्त करावी, अशी मागणी प्रवासी व स्थानिक नागरिक करीत आहेत.
पाटस- कानगाव हा वर्दळीचा मार्ग आहे. याच रस्त्यावर पाटस रेल्वेस्थानक असल्याने रेल्वेने प्रवास करणारे प्रवासी, विद्यार्थी, शेतकरी व इतर नागरिकांचा दैनंदिन वावर असतो. मांडवगण फराटा, कानगाव गावांतून अनेक विद्यार्थी व शेतकरी येथे येतात. तसेच सिमेंट कंपनी, ऊस वाहतूक, इतर वाहनांची देखील वर्दळ असते. सध्या पावसाळा सुरू असल्याने रस्त्यावरील खड्ड्यांमध्ये पाणी साचत आहे. खड्ड्यांतून मार्ग काढताना दुचाकीस्वारांना कसरत करावी लागत आहे. याठिकाणी रात्रीच्यावेळी अनेकदा खड्डा चुकविण्याच्या नादात दुचाकी घसरण्याचे प्रकार घडले आहे.

कानगाव- पाटस रस्त्याने दिवसेंदिवस वाहनांची वर्दळ मोठ्या प्रमाणात वाढत आहे. यामध्ये प्रामुख्याने सिमेंट कंपनी, गुऱ्हाळ घरे यांची अवजड वाहतूक मोठ्या प्रमाणात आहे. अवजड वाहतुकीमुळे या रस्त्याला खड्डे पडले आहे. या खड्ड्यांमधून मार्ग काढताना मोठी कसरत करावी लागत आहे.
- सागर शितोळे, माजी सभापती