कोरेगाव भीमा, ता. २६ : पहलगाम येथे पर्यटकांवरील हल्ल्याच्या निषेधार्थ पेरणे येथील संत तुकाराम स्पर्धा परीक्षा अभ्यासिकेच्या वतीने पेरणे-लोणीकंद-पेरणे फाटा-कोरेगाव भीमा-वढू ते डिंग्रजवाडी चौक अशी मोटारसायकल रॅली काढून या भ्याड हल्ल्याचा कठोर शब्दात निषेध करण्यात आला.
प्रबोधन केंद्र व स्पर्धा परीक्षा अभ्यासिकेचे संस्थापक उत्तमराव भोंडवे यांच्या नेतृत्वाखाली तिरंगा ध्वजासह काढण्यात आलेल्या या रॅलीमध्ये पेरणे, लोणीकंद, कोरेगाव भीमा, वढू व डिंग्रजवाडीसह पंचक्रोशीतील अनेक पदाधिकारी व नागरिक सहभागी झाले होते.
हल्यात महाराष्ट्रातील सहा जणांसह २६ पर्यटकांचा गोळीबाराने मृत्यू झाला. ही अत्यंत दुर्दैवी व भारतीय नागरिकांच्या मनात चिड आणणारी घटना आहे. या घटनेतील मृतांना श्रद्धांजली अर्पण करणे, तसेच या घटनेचे केंद्र सरकारने पाकिस्तानला चोख प्रत्युत्तर द्यावे, त्यासाठी भारतीय सैनिकांचे मनोधैर्य वाढविणे तसेच समाजात एकजुटीबाबत जनजागृती करणे या उद्देशाने ही रॅली काढण्यात आल्याचे भोंडवे यांनी सांगितले.
यावेळी विद्यार्थ्यांनी पाकिस्तानच्या निषेधाच्या घोषणा देत देशाला पूर्ण पाठिंबा व्यक्त केला. तर लोणीकंदमध्ये मारुती मंदिर व ग्रामपंचायत चौकात लोकनायक जय प्रकाश नारायण ज्येष्ठ नागरिक संघाच्या काही सदस्यांनी आपल्या भावनाही व्यक्त केल्या.
04899