केसनंद, ता. ४ : सावित्रीबाई फुले पुणे विद्यापीठ व विद्यार्थी विकास महामंडळाच्या वतीने ‘जल्लोष २०२५’ या विभागीय युवक महोत्सवाचे सलग तिसऱ्यांदा आयोजन करण्याचा मान लोणीकंद (ता. हवेली) येथील श्री रामचंद्र अभियांत्रिकी महाविद्यालयाला मिळाला. या महोत्सवात पाच विविध कला प्रकारात २० महाविद्यालयातील सुमारे एक हजार विद्यार्थ्यांनी सहभाग नोंदवला.
श्रीरामचंद्र एज्युकेशन सोसायटीचे संस्थापक सचिव शंकर भूमकर यांनी या युवक महोत्सवाचे उद्‍घाटन केले. याप्रसंगी शंकर भूमकर यांनी विद्यार्थ्यांना मार्गदर्शन करताना ‘सुप्त गुणशक्तीला जागृत करून प्रबळ इच्छाशक्तीद्वारे जीवनाच्या विविध क्षेत्रात उत्तुंग नावलौकिक मिळवा,’ असा संदेश दिला. स्पर्धेमध्ये वैयक्तिक व सांघिक विजेत्यांना पारितोषिके देऊन सन्मानित केले.
यावेळी व्यासपीठावर संस्थेचे खजिनदार उद्धव रामचंद्र भूमकर, प्राचार्य डॉ. देविदास वायदंडे, पुणे विद्यापीठाचे सिनेट सदस्य व बीजेएस कॉलेजचे डॉ. रमेश गायकवाड, महाविद्यालयाचे प्राचार्य डॉ. अविनाश देसाई, डॉ. माधुरी देशमुख, तंत्र संचालक सिद्धांत शंकर भुमकर, महाविद्यालयाचे विकास महामंडळाचे अधिकारी तृप्ती फरांदे आदी उपस्थित होते.
बक्षीस वितरणप्रसंगी सावित्रीबाई फुले पुणे विद्यापीठ विद्यार्थी विकास मंडळाचे संचालक डॉ. अभिजित कुलकर्णी, तसेच विद्यापीठ मॅनेजमेंट कौन्सिलिंगचे सदस्य डॉ. संजय पालवे यांनीही मनोगत व्यक्त केले.
प्राचार्य डॉ.अविनाश देसाई यांच्यासह महाविद्यालयीन विभाग प्रमुख व प्राध्यापकांनी या कार्यक्रमासाठी परिश्रम घेतले. महाविद्यालयाच्या सांस्कृतिक समन्वयक व क्रीडा संचालिका डॉ. सुषमा तायडे यांनी प्रास्ताविक केले.