केसनंद, ता. १२ : नागरिकांच्या दैनंदिन प्रश्नांचे त्वरित निराकरण करण्यासाठी राज्य शासनाच्या ‘छत्रपती शिवाजी महाराज महाराजस्व समाधान शिबिर’ अभियानांतर्गत राज्याचे महसूलमंत्री चंद्रशेखर बावनकुळे यांच्या उपस्थितीत लोणीकंद येथे सोमवारी (ता. १३) सकाळी १० वाजता समाधान शिबिराचे आयोजन करण्यात आले आहे. लोणीकंद जिल्हा परिषद प्राथमिक शाळेजवळच्या बहुउद्देशीय इमारतीत लोणीकाळभोर अपर तहसील कार्यालयाअंतर्गत आयोजित या शिबिरात प्रशासनाकडून शिधापत्रिकेत नवीन नाव समाविष्ट करणे किंवा नाव कमी करणे, उत्पन्नाचा दाखला, शालेय विद्यार्थ्यांसाठी जातीचे दाखले, नॉन-क्रिमीलेअर, डोमिसाईल (अधिवास) दाखले, तुकडेबंदी शासन निर्णयानुसार मान्य नोंदी, ७/१२ उताऱ्यावरील चूक दुरुस्ती आणि वारस नोंदी करणे, संजय गांधी निराधार योजना आणि श्रावणबाळ सेवा राज्य निवृत्तिवेतन या योजनांचा लाभ नागरिकांना एकाच छताखाली घेता येणार आहे.