केडगाव, ता. १२ : केडगाव (ता. दौंड) येथील दुय्यम निबंधक कार्यालयातील विविध तक्रारीबाबत पुणे येथे सुरू असलेले उपोषण मागे घेण्यात आले आहे, अशी माहिती उपोषणकर्ते ॲड. श्रीनाथ वेताळ यांनी दिली. १५ दिवसांत अहवाल आल्यानंतर कार्यवाही केली जाईल, असे आश्वासन त्यांना देण्यात आले आहे.
केडगाव येथील दुय्यम निबंधक कार्यालयात खरेदीखत करताना मुद्रांक शुल्क बेकायदेशीरपणे मोठ्या प्रमाणात कमी केले जाते. ऑगस्ट २०२५ मध्ये अशाच एका दस्तामध्ये दीड कोटी रुपयांचे मुद्रांक शुल्क बुडवण्यात आल्याचा आरोप आहे. हे प्रकरण वेताळ यांनी उघडकीस आणले होते. याच कार्यालयात बेकायदेशीरपणे एक दोन गुंठ्याचे खरेदीखत केले जात आहेत. याबाबत तक्रार करूनही वेताळ यांना प्रतिसाद मिळत नव्हता. त्यामुळे त्यांनी पूणे येथील विधान भवनसमोर उपोषण सुरू केले होते. नोंदणी महानिरीक्षक कार्यालयाने नोंदणी उप महानिरीक्षक व मुद्रांक उपनियंत्रक यांना १५ दिवसांत अहवाल देण्याचा आदेश देत एक महिन्यात कार्यवाही करण्याचे आश्वासन दिले. त्यामुळे त्यांनी उपोषण मागे घेतले.