कोळवण, ता. ३१ : पौड येथे पुणे-कोलाड राष्ट्रीय महामार्ग क्रमांक ७३५ एफ आणि पौड कोळवण रस्त्यावरील चाले येथील पुलाच्या रखडलेल्या कामासंदर्भात शिवसेना उद्धव बाळासाहेब ठाकरे पक्ष मंगळवारी (ता. ३) रास्ता रोको करणार आहे. त्याचे पत्र तहसीलदार, मुळशी आणि पौड पोलिसांना देण्यात आले आहे. यावेळी पक्षाचे तालुकाप्रमुख सचिन खैरे, स्वाती ढमाले, राम गायकवाड, ज्ञानेश्‍वर डफळ, वैभव शितोळे, वैभव पवळे, मोहन आवळे, मुकेश लोयरे उपस्थित होते.
कोलाड महामार्गावर आवश्‍यक ठिकाणी संरक्षक भिंत नाहीत. आहेत त्या मजबूत नाहीत. पिरंगुट आणि ताम्हिणी घाटात रस्त्याच्या कडेला गटारांची अवस्थाही व्यवस्थित नाही. या महामार्गावर सुमारे १०० नागरिकांचा अपघाती मृत्यू झाला आहे. त्यासंदर्भातले वारंवार निवेदन देऊनही त्याकडे दुर्लक्ष होत असल्याने रास्ता रोको करण्यात येणार आहे.