कोळवण, ता. १ : सध्या बारावी व दहावीचे प्रवेश सुरू आहेत, या प्रवेशासाठी विविध प्रकारचे दाखले आवश्यक असतात. दाखले काढण्यासाठी विद्यार्थी व पालक यांची पौड (ता. मुळशी) येथील नागरी सुविधा केंद्र व इतर ठिकाणी असणाऱ्या महा- ई सुविधा केंद्रात गर्दी होत आहे. मात्र, सर्व्हर डाऊन असल्यामुळे दाखले मिळण्यास अडथळा निर्माण होत आहे. यामुळे महाविद्यालयीन प्रवेश घेण्यासाठी विद्यार्थ्यांना अडचणी निर्माण होणार आहे.
तसेच, वैद्यकीय कामांसाठी आवश्यक उत्पन्न दाखले वेळेवर मिळत नसल्याने सवलतीच्या दरात विविध रुग्णालयात उपचार घेणाऱ्या रुग्णांना वैद्यकीय सवलती मिळण्यात अडचणी येत आहेत. सर्व्हरला १९ मे पासून समस्या निर्माण झाल्या आहेत. तयार दाखल्यांच्या प्रिंट सर्व्हरला समस्या असल्याने देता येत नाहीत व विविध दाखल अर्जांच्या पावत्याही तयार होत नाही, असे तहसील कार्यालयातील नागरिक सुविधा केंद्र संचालक विठ्ठल पवार यांनी सांगितले
यावर तातडीने उपाय करून नागरिकांना दिलासा द्यावा, अशी मागणी निवेदनाद्वारे शिवसेना उद्धव बाळासाहेब ठाकरे यांच्या पक्षाकडून तहसीलदार मुळशी यांच्याकडे करण्यात आली आहे.

सर्व्हरला समस्या या संपूर्ण राज्यात आहेत यावर ‘राष्ट्रीय सूचना केंद्र’ लवकरच उपाय करेल व सर्व्हरच्या समस्या दूर होतील. तोपर्यंत नागरिकांना अडचणी येऊ नये म्हणून विविध दाखल्यांचे अर्जांच्या ऑनलाइन पावतीऐवजी ऑफलाइन पावती देण्याच्या सूचना दिल्या आहेत.
-रणजित भोसले, तहसीलदार मुळशी.