शिक्रापूर, ता.३० : येथील अजित रसाळ यांच्या बंद घराचे कुलूप तोडून चोरट्य़ांनी तीन तोळे सोन्याचे दागिने लांबविले. याबाबत शिक्रापूर पोलिसांनी अज्ञात चोरट्याच्या विरोधात गुन्हा दाखल केला.
शिक्रापूर पोलिसांनी दिलेल्या माहितीनुसार, येथील पाटवस्ती परिसरात राहणारे अजित रसाळ हे दोन दिवसांपूर्वी घराला कुलूप लावून आपल्या मूळ गावी आई-वडिलांना भेटण्यासाठी गेले होते. ते गावाला गेल्यानंतर दुसऱ्याच दिवशीच्या पहाटे अजित यांच्या घराचा दरवाजा उघडा असल्याचे आणि दरवाजात चिखलाच्या पावलांचे ठसे दिसत असल्याचे जवळच राहणारे विकास मदने यांना दिसले. त्यांनी या बाबतची माहिती तत्काळ अजित यांना मोबाईलवरून दिली. त्यानंतर अजित हे शिक्रापुरात आले व त्यांनी घराची पाहणी केली असता त्यांच्या घराच्या दरवाजाच्या गेटसह दरवाजाचे कुलूप तोडून कुणीतरी घरात प्रवेश केला होता व घरात जाऊन कपाटाचे कुलूप तोडून, कपाटातील तब्बल तीन तोळे वजनाचे सोन्याचे दागिने चोरी केल्याचे दिसून आले. याबाबत अजित महादेव रसाळ (वय ३०, रा.पाटवस्ती, शिक्रापूर, ता.शिरू मूळ रा.लाखेवाडी, ता.इंदापूर) यांनी शिक्रापूर पोलिस ठाण्यात येथे फिर्याद दिली. पोलिसांनी अज्ञात चोरट्यावर गुन्हा दाखल केला असून पुढील तपास पोलिस उपनिरीक्षक महेश डोंगरे व प्रतीक जगताप हे करत आहे.