काटेवाडी, ता. २३: राष्ट्रीय कृषी विकास योजनेअंतर्गत ‘प्रति थेंब अधिक पीक’ योजनेसाठी २०२५-२६ पासून शेतकऱ्यांना अर्ज करण्यासाठी फार्मर आयडी बंधनकारक करण्यात आला आहे. महाराष्ट्र राज्य कृषी आयुक्तालय, पुणे यांनी यासंदर्भात सर्व जिल्हा अधीक्षक कृषी अधिकाऱ्यांना आणि विभागीय कृषी सहसंचालकांना सूचना जारी केल्या आहेत.
महाडीबीटी पोर्टलवर शेतकरी नोंदणी आता फार्मर आयडीद्वारे होणार आहे. योजनेचा लाभ घेण्यासाठी शेतकऱ्यांनी अर्ज सादर करताना आवश्यक कागदपत्रे अपलोड करणे बंधनकारक आहे. यामध्ये पूर्वसंमतीपूर्वी संयुक्त क्षेत्र असल्यास संमतीपत्र आणि हमीपत्र (परिशिष्ट ७) अपलोड करावे लागेल. तर पूर्वसंमतीनंतर देयके, सूक्ष्मसिंचन अंतिम आराखडा, सूक्ष्मसिंचन संच दरपत्रक आणि काम पूर्णत्वाचा दाखला सादर करावा लागेल. ही माहिती शेतकऱ्यांपर्यंत पोहोचवण्याचे निर्देश कृषी आयुक्तालयाने दिले असून, याबाबत १५ जुलै २०२५ रोजी झालेल्या महाडीबीटी आढावा बैठकीत चर्चा झाली होती. शेतकऱ्यांनी या योजनेचा लाभ घेण्यासाठी वेळेत कागदपत्रे सादर करावीत, असे आवाहन कृषी उपसंचालक, फलोत्पादन संजय सूर्यवंशी यांनी केले आहे.