काटेवाडी, ता. २३ : बारामती कृषी उत्पन्न बाजार समितीच्या लिलाव बाजारात गुरुवारी (ता.२१) मुगाला उच्चांकी १२,५५० रुपये प्रतिक्विंटल बाजारभाव मिळाला. कमाल बाजारभाव १,१५० रुपयांनी कमी झाले. तरीही मुगाला सातत्याने चांगला बाजारभाव मिळत आहे. यामुळे शेतकऱ्यांमध्ये समाधान आहे.
मका, ज्वारी आणि बाजरीच्या दरांमध्येही स्थिरता दिसून आली. गहू-लोकवनची सर्वाधिक ४३३ क्विंटल आवक नोंदवली गेली. बाजारात एकूण १,७०९ क्विंटल धान्याची आवक झाली. यामध्ये गहू-लोकवन (४३३ क्विंटल), गहू-२१८९ (२८८ क्विंटल), बाजरी-हायब्रीड (२०६ क्विंटल), ज्वारी-हायब्रिड (१८१ क्विंटल), बाजरी-महिको (१३८ क्विंटल), ज्वारी-गावरान (१२० क्विंटल) आणि मका-तांबडी (६५ क्विंटल) यांचा समावेश होता. मका-तांबडीला २,२७५ ते २,७०१ रुपये, ज्वारी-गावरानला २,६०० ते ३,५५१ रुपये, ज्वारी-हायब्रिडला १,९०० ते २,८५१ रुपये, बाजरी-महिकोल २,५५१ ते ३,१०० रुपये आणि बाजरी-हायब्रीडला २,००० ते २,८०० रुपये प्रतिक्विंटल दर मिळाले. बाजारातील स्थिर दरांमुळे शेतकऱ्यांना दिलासा मिळाला आहे.