काटेवाडी, ता. १ : जागतिक साक्षरता दिनानिमित्त महाराष्ट्रात १ ते ८ सप्टेंबर या कालावधीत साक्षरता सप्ताह साजरा केला जात आहे. यंदाची थीम ‘डिजिटल युगात साक्षरतेचा प्रसार- उल्लास कार्यक्रमातून’ आहे. यात पारंपरिक आणि डिजिटल साक्षरतेच्या एकत्रीकरणावर भर आहे. भारत सरकारच्या उल्लास कार्यक्रमातून प्रत्येक नागरिकाला आयुष्यभर शिकण्याच्या संधी उपलब्ध करणे हा उद्देश आहे. या सप्ताहात घरोघरी नोंदणीपासून रॅली, परिसंवाद आणि सांस्कृतिक कार्यक्रमापर्यंत विविध उपक्रम राबवले जाणार आहेत, अशी माहिती शिक्षण सहसंचालक राजेश क्षीरसागर यांनी दिली. या कालावधीत घरोघरी नोंदणी, विशेष सहभाग, जागरूकता सभा, गावोगावी जाणीव, रॅली आणि नाटिका, भित्तिचित्र आणि पोस्टर, चर्चासत्र, साक्षरता उत्सव असे कार्यक्रम राबविले जाणार आहेत.