खुटबाव, ता. ६ : खोर (ता. दौंड) हे सर्वाधिक दुष्काळी गाव समजले जाते. आमदार राहुल कुल व शशांक फाउंडेशन यांच्या माध्यमातून खोर परिसरातील राजुरी पाटी येथील ५ एकर क्षेत्रामध्ये विस्तीर्ण असणाऱ्या तलावात ३ वर्षांनी जनाई शिरसाईच्या आवर्तनाद्वारे पाणी आले. या निर्णयामुळे १०० एकर शेती व परिसरातील वाडी वस्तीसाठी आगामी तीन महिने पुरेल एवढा पाणीसाठा उपलब्ध झाला आहे. यामुळे ग्रामस्थांनी आनंदोत्सव साजरा केला.

राजुरी पाटी येथे २००३-०४ मध्ये खोरचे माजी उपसरपंच पोपटराव चौधरी यांचा संकल्पनेतून तत्कालीन आमदार रंजना कुल यांनी सुमारे ५ एकर क्षेत्रामध्ये रोजगार हमी योजनेअंतर्गत शेती व पिण्याच्या पाण्यासाठी तलाव निर्माण केला. यासाठी गुलाबराव चौधरी, साहेबराव चौधरी, बबन चौधरी, नारायण चौधरी, भगवान चौधरी व कांतिलाल चौधरी या भावंडांनी विनामोबदला जमीन हस्तांतरित केली. सदर तलाव बांधल्यामुळे १०० एकर जमीन पाण्याखाली आली. मागील ३ वर्ष नियोजन नसल्याने हा तलाव कोरडा होता. शेती, वन्यजीव तसेच ग्रामस्थांना पिण्याचे पाणी याची अडचण येत होती. आमदार राहुल कुल यांचा प्रयत्नांतून ५ वर्षांपूर्वी खोरसाठी जनाई शिरसाई योजनेची वार्षिक ३ आवर्तने मिळू लागली, परंतु संबंधित राजुरी पाटी येथील तलाव ओढ्यापासून लांब असल्याने जनाई शिरसाई योजनेचे पाणी पोहचत नव्हते.

शशांक फाउंडेशनतर्फे ११०० फूट जलवाहिनी
शशांक फाउंडेशनचे अध्यक्ष सुभाष चौधरी व संस्थापक विकास चौधरी यांनी या तलावाला जोडणारी ११०० फूट लांबीची बंदिस्त जलवाहिनी शशांक फाउंडेशनच्या माध्यमातून मोफत यशस्वीरीत्या पूर्ण केली. त्यानंतर ८ दिवसांपूर्वी आमदार राहुल कुल यांच्या प्रयत्नातून खोरला जनाई शिरसाईचे आवर्तन मिळाले. या आवर्तनातूनच बंद जलवाहिनीद्वारे राजुरी पाटी येथील तलाव ३ वर्षानंतर प्रथमच भरण्यात आला.

तीन वर्षांनी तलावामध्ये पाणी येणे हा आमच्यासाठी आनंदाचा क्षण आहे. शशांक फाउंडेशनला या कामी दौंडचे आमदार राहुल कुल यांचे सहकार्य मिळत आहेत. आजतागायत फाउंडेशनच्या माध्यमातून रक्तदान शिबिर, वृक्षारोपण व संवर्धन, शैक्षणिक साहित्य मदत, विद्यार्थी दत्तक योजना, ड्रायव्हिंग लायसन्स शिबिर आदी उपक्रम राबवण्यात आले आहेत.
- विकास चौधरी, संस्थापक शशांक फाउंडेशन

01980