खुटबाव, ता.८ : दौंड तालुक्यामध्ये आडसाली ऊस लागवडीला वेग आला आहे. यंदा तालुक्यात सर्वदूर पाऊस झाल्याने उच्चांकी १८ हजार हेक्टर आडसाली ऊस लागवड होईल, असा अंदाज कृषी अधिकाऱ्यांसह शेतकऱ्यांनी व्यक्त केला आहे. तालुक्यात ३७५ मिलिमीटर पाऊस पडल्याने लागवडीस उशिरा प्रारंभ झाला आहे.

शेतकरी साडेतीन फूट अंतरावरील सरी तसेच आधुनिक पट्टा पद्धतीने ऊस लागवडी करण्यावर भर देत आहेत. आषाढीवारी झाल्यानंतर शेतकरी शेतीच्या मशागतीत गुंतला आहे. मुळा मुठा व भीमा नदीच्या बारमाही पाण्यामुळे व‌ खडकवासलाच्या नवा मुठा कालव्यातून मिळणाऱ्या आवर्तनामुळे दौंड तालुक्यामध्ये मोठ्या प्रमाणावर ऊस लागवड केली जाते. सध्या पावसाने उघडीप दिल्याने शेतकरी शेतीकामात गुंतला आहे. आडसाली, पूर्वहंगामी व सुरू ऊस अशा तीन टप्प्यात उसाची लागवड केली जाते. मजूर प्रतिएकर लागवडीसाठी सात हजार रुपये घेत आहेत.

३५०० रुपये प्रतिटन दराने बेणे खरेदी
साखर कारखान्यावर तीन हजार रुपयापर्यंत प्रतिटन बाजारभाव मिळाला आहे. चालू वर्षी उसाच्या बेण्याचे बाजारभाव देखील वाढले असून ३५०० रुपये प्रतिटन या दराने उसाचे बेणे खरेदी करण्याची वेळ शेतकरी वर्गावर आली आहे.

या ऊस बियाणांना शेतकऱ्यांचे प्राधान्य
कोएम--८६०३२,
फुले --२६५,
कोएम- ८००५

एआय पद्धतीने उत्पादन घेण्याची तयारी
काही शेतकरी रोपवाटिकेतून उसाचे रोप आणून, लागवड करत आहेत तर एआय पद्धतीने ऊस उत्पादन घेण्याच्या तयारीत आहेत. लागवड करताना सरी पद्धती, आधुनिक पट्टा पद्धतीने लागवड करण्यावर विशेष भर दिला जात आहे. यामध्ये सरींमध्ये साडेतीन फूट तर दोन पट्ट्यातील अंतर हे साडेचार फूट ठेवण्यात येत आहे.

शेतकऱ्यांनी खते बियाणे खरेदी करताना अधिकृत कृषी सेवा केंद्रातून पक्की बिले घेऊन खरेदी करावी. शेतकऱ्यांनी बीज प्रक्रिया करूनच चांगल्या उत्पादनासाठी बीबीएफ पद्धतीने किंवा टोकन पद्धतीने पेरणी करावी. लागवडीसाठी सुपरकेन नर्सरी या तंत्रज्ञानाचा वापर करावा.
- राहुल माने, तालुका कृषी अधिकारी दौंड

02629